സന: യെമനില് വധശിക്ഷയ്ക്ക് വിധിക്കപ്പെട്ട് ജയിലില് കഴിയുന്ന മലയാളി യുവതി നിമിഷപ്രിയയെ നേരിട്ട് കാണാന് അമ്മ പ്രേമകുമാരിയും മനുഷ്യാവകാശ പ്രവര്ത്തകനായ സാമുവല് ജെറോമും സനയിലെത്തി. നാളെ ജയിലില് എത്തി നിമിഷ പ്രിയയെ കാണാനുളള ശ്രമത്തിലാണ് ഇവര്.
നിമിഷയുടെ മോചനത്തിനായി ബ്ലഡ് മണി സംബന്ധിച്ച് ചര്ച്ചകള് നടത്താനാണ് നീക്കം. ഗോത്രത്തലവന്മാരുമായി ചര്ച്ച നടത്താനുളള എല്ലാ തയാറെടുപ്പുകളും നടത്തിയെന്നും യെമനില് സ്വാധീനമുള്ള വ്യക്തികളെ മുന്നില് നിര്ത്തി കാര്യങ്ങള് ചര്ച്ച ചെയ്യുമെന്നും ഇരുവരും പറഞ്ഞു.
കഴിഞ്ഞ ദിവസമാണ് അമ്മ പ്രേമകുമാരിയും സേവ് നിമിഷ പ്രിയ ഫോറത്തിലെ സാമുവല് ജെറോമും യെമനില് എത്തിയത്. യെമനിലെ നിയമപ്രകാരം കൊല്ലപ്പെട്ടയാളുടെ കുടുംബം അനുമതി നല്കിയാല് നിമിഷപ്രിയയെ മോചിപ്പിക്കാനാകും.
