കൊച്ചി: സമുദ്രമത്സ്യകൃഷിയില്‍ വലിയമുന്നേറ്റത്തിന് മിഴിതുറന്ന് മഞ്ഞപ്പാരയുടെ (ഗോള്‍ഡന്‍ ട്രെവാലി) കൃത്രിമ വിത്തുല്‍പാദനം വിജയകരമായി. കേന്ദ്ര സമുദ്രമത്സ്യഗവേഷണ സ്ഥാപനത്തിലെ (സിഎംഎഫ്ആര്‍ഐ) ഗവേഷകരാണ് അഞ്ച് വര്‍ഷത്തെ പരീക്ഷണത്തിനൊടുവില്‍ ഈ മീനിന്റെ വിത്തുല്പാദന സാങ്കേതികവിദ്യ വികസിപ്പിച്ചത്. ഭക്ഷണമായി കഴിക്കാനും അലങ്കാരമത്സ്യമായും ഉപയോഗിക്കുന്ന ഉയര്‍ന്ന വിപണിമൂല്യമുള്ള മത്സ്യമാണ് മഞ്ഞപ്പാര.
കൃഷിയിലൂടെ സമുദ്രമത്സ്യോല്‍പാദനം കൂട്ടാന്‍ സഹായിക്കുന്നതാണ് ഈ നേട്ടം. മികച്ച വളര്‍ച്ചാനിരക്കും ആകര്‍ഷകമായ രുചിയുമാണ് ഈ മീനിന്. അതിനാല്‍ തന്നെ കടല്‍കൃഷിയില്‍വലിയ നേട്ടം കൊയ്യാനാകും. സിഎംഎഫ്ആര്‍ഐയുടെ വിശാഖപട്ടണം റീജണല്‍ സെന്ററിലെ സീനിയര്‍ സയന്റിസ്റ്റ് ഡോ. റിതേഷ് രഞ്ജന്റെ നേതൃത്വത്തിലുള്ള ഗവേഷകസംഘമാണ് നേട്ടത്തിന് പിന്നില്‍.
ഇവയുടെ പ്രജനന സാങ്കേതികവിദ്യ വിജയകരമായതോടെ, കടലില്‍കൂടുമത്സ്യകൃഷി പോലുള്ള രീതികളില്‍ വ്യാപകമായി ഇവയെകൃഷിചെയ്യാനുള്ള അവസരമാണ് കൈവന്നിരിക്കുന്നത്. കിലോക്ക് 400 മുതല്‍ 500 വരെയാണ് ഇവയുടെ ശരാശരി വില. ആഭ്യന്തര, വിദേശവിപണികളില്‍ ആവശ്യക്കാരേറെയാണ്. ഈ ഇനത്തിലെ ചെറിയ മീനുകളെയാണ് അലങ്കാരമത്സ്യമായി ഉപയോഗിക്കുന്നത്. ചെറുമീനുകള്‍ക്ക്കൂടുതല്‍ സ്വര്‍ണനിറവും ആകര്‍ഷണീയതയുമുണ്ട്. വലിയ അക്വേറിയങ്ങളിലെല്ലാം ഇവയെ പ്രദര്‍ശിപ്പിക്കാറുണ്ട്. അലങ്കാര മത്സ്യ വിപണിയില്‍ മീനൊന്നിന് 150 മുതല്‍ 250 രൂപ വരെയാണ് വില.
പവിഴപ്പുറ്റുകളുമായി ചേര്‍ന്ന് സ്രാവ്, കലവ തുടങ്ങിയ മത്സ്യങ്ങളുടെകൂട്ടത്തിലാണ് മഞ്ഞപ്പാര ജീവിക്കുന്നത്. സ്രാവുകളുടെ സഞ്ചാരപഥത്തില്‍ വഴികാട്ടികളായി ഈ ഇനത്തിലെ ചെറിയ മീനുകളെ കാണാറുണ്ട്. ഭാരതത്തില്‍ തമിഴ്‌നാട്, പുതുച്ചേരി, കേരളം, കര്‍ണാടക, ഗുജറാത്ത് എന്നിവിടങ്ങളിലാണ് കാണപ്പെടുന്നത്. എന്നാല്‍ മത്സ്യബന്ധനം വഴി ഇവയുടെ ലഭ്യത കുറഞ്ഞുവരുന്നതായാണ് കാണപ്പെടുന്നത്. 2019ല്‍ 1106 ടണ്‍ ഉണ്ടായിരുന്നത് 2023 ല്‍ 375 ടണ്ണായി കുറഞ്ഞു. മാരികള്‍ച്ചര്‍ രംഗത്ത് ഒരു നാഴികക്കല്ലായി ഈ നേട്ടം അടയാളപ്പെടുത്തുമെന്ന് സിഎംഎഫ്ആര്‍ഐ ഡയറക്ടര്‍ ഡോ. എ. ഗോപാലകൃഷ്ണന്‍ പറഞ്ഞു. കടലില്‍ ലഭ്യതകുറയുന്ന സാഹചര്യത്തില്‍, ഇവയുടെ കൃത്രിമ പ്രജനനത്തിലെ വിജയത്തിന് അതീവപ്രാധാന്യമുണ്ട്. കൃഷിയിലൂടെയും സീറാഞ്ചിംഗിലൂടെയും ഇവയുടെ ഉല്‍പാദനം കൂട്ടാന്‍ ഇത് വഴിയൊരുക്കുമെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: