തിരുവനന്തപുരം: കേരളത്തില്‍ നിന്നുള്ള കോഴി, താറാവ് എന്നിവയുടെ ഇറച്ചികളോ മുട്ടകളോ കൊണ്ടുവരുന്ന വാഹനങ്ങൾ തമിഴ്നാട് തിരിച്ചയയ്ക്കുന്നു. ആലപ്പുഴയില്‍ പക്ഷിപ്പനി റിപ്പോര്‍ട്ട് പുറത്തുവന്നതോടെ തമിഴ്നാട് ഉള്‍പ്പെടെയുള്ള അന്യസംസ്ഥാനങ്ങള്‍ അതിര്‍ത്തിയില്‍ പരിശോധന കര്‍ശനമാക്കുകയാണ്.
കേരള അതിർത്തിയിലെ 12 ചെക് പോസ്റ്റുകളിലും 24 മണിക്കൂറും നിരീക്ഷണത്തിനായി പ്രത്യേക സംഘത്തെ നിയോഗിച്ചിരിക്കുകയാണ് തമിഴ്നാട്. വെറ്ററിനറി ഡോക്ടർ, ഇൻസ്പെക്ടർ അടക്കം അഞ്ച് പേരാണ് സംഘത്തിൽ ഉണ്ടാവുക.
ആലപ്പുഴ ജില്ലയില്‍ പക്ഷിപ്പനി സ്ഥിരീകരിച്ചിട്ടുണ്ടെങ്കിലും ആശങ്കപ്പെടേണ്ട സാഹചര്യമില്ലെന്നാണ് കേരളത്തിലെ മന്ത്രി ചിഞ്ചുറാണി പറയുന്നത്. 17,480 താറാവുകളെയാണ് ഇതുവരെ കൊന്നത്. 34 തദ്ദേശസ്ഥാപനങ്ങളിൽ താറാവ്, കോഴി എന്നിവയുടെ ഇറച്ചി, മുട്ട വില്പനയ്‌ക്ക് ഏപ്രിൽ 26 വരെ നിരോധനം ഏര്‍പ്പെടുത്തിരിക്കുകയാണ്.
ആലപ്പുഴ ജില്ലയിലെ ചെറുതന, എടത്വ എന്നീ പഞ്ചായത്തുകളിലാണ് പക്ഷിപ്പനി സ്ഥിരീകരിച്ചിട്ടുള്ളത്. രോഗ ബാധിത പ്രദേശത്തിന്റെ ഒരു കിലോമീറ്റര്‍ ചുറ്റളവിലുള്ള സ്ഥലത്തുള്ള മുഴുവന്‍ താറാവുകളെയും കൊന്നു.
പ്രതികരിക്കാൻ ഇവിടെ എഴുതുക: