ബാലരാമപുരം: കോണ്‍ഗ്രസിന് വോട്ട് ചെയ്ത് ശശി തരൂരിനെ ജയിപ്പിച്ചത് വെറുതെയായെന്നും അദ്ദേഹത്തിന് ഇനി വിശ്രമം കൊടുക്കണമെന്നും ബിജെപി ദേശീയ അധ്യക്ഷന്‍ ജെ.പി.നദ്ദ. ‘ഇന്‍ഡി’ സഖ്യം അഴിമതിക്കാരെ രക്ഷിക്കാന്‍ വേണ്ടിയുള്ളതാണ്. സര്‍ക്കാര്‍ പണം കൊള്ളയടിച്ച പലരും ജയിലാണ്.
മുഖ്യമന്ത്രി പിണറായി വിജയന്‍ കള്ളക്കടത്തിന്റെ തിരക്കിലാണെന്നും നദ്ദ പറഞ്ഞു. തിരുവനന്തപുരം പാര്‍ലമെന്റ് മണ്ഡലത്തിലെ എന്‍ഡിഎ സ്ഥാനാര്‍ത്ഥി രാജീവ് ചന്ദ്രശേഖറിന്റെ തെരഞ്ഞെടുപ്പ് പ്രചരണത്തിനായി ബാലരാമപുരത്ത് എത്തിയതായിരുന്നു ജെ.പി. നദ്ദ. യുഡിഎഫും എല്‍ഡിഎഫും തമ്മില്‍ വ്യത്യാസമില്ല. ഇന്‍ഡി സഖ്യം നേതാക്കള്‍ ഒന്നുകില്‍ ജയിലിലാണ്, അല്ലെങ്കില്‍ ജാമ്യത്തിലാണ്. അഴിമതിക്കാരുടെ കൂട്ടായ്മയാണത്. രാഹുല്‍ ഗാന്ധിയും സോണിയ ഗാന്ധിയും ഒക്കെ ജാമ്യത്തിലാണ്. കെജ്‌രിവാളും സിസോദിയയും ജയിലാണെന്ന് അദ്ദേഹം പറഞ്ഞു.
കഴിഞ്ഞ 10 വര്‍ഷവും നരേന്ദ്രമോദി സര്‍ക്കാര്‍ ഗ്രാമങ്ങളുടെയും പാവപ്പെട്ടവരുടെയും വികസനത്തിനു വേണ്ടി ഭരിച്ചു. രാജ്യത്തിന് നല്ല അടിസ്ഥാന സൗകര്യങ്ങള്‍ നല്‍കി. രാജീവ് ചന്ദ്രശേഖറിന് നല്‍കുന്ന വോട്ട് മോദിയെ മൂന്നാം തവണ പ്രധാനമന്ത്രിയാക്കാന്‍ വേണ്ടിയുള്ളതാണ്. പത്ത് വര്‍ഷം മുമ്പ് നമ്മള്‍ ഉപയോഗിച്ചത് ചൈനയിലും കൊറിയയിലും ഉണ്ടാക്കിയ ഫോണുകളാണ്.
ഇപ്പോള്‍ നമ്മുടെ കയ്യില്‍ ഉള്ളത് ഇന്ത്യയില്‍ ഉണ്ടാക്കിയ ഫോണുകളാണ്. രാജീവ് ചന്ദ്രശേഖര്‍ ജയിച്ചാല്‍ വികസനം ഉറപ്പാണെന്നും ജെ.പി. നദ്ദ പറഞ്ഞു. ബാലരാമപുരത്തിന് ആവേശമായി നദ്ദയുടെ റോഡ്‌ഷോ. മുടവൂര്‍പ്പാറിയില്‍ നിന്നും ആരംഭിച്ച റോഡ് ഷോ ശാലിഗോത്ര തെരുവില്‍ സമാപിച്ചു. സ്ത്രീകളായിരുന്നു റോഡ് ഷോയില്‍ അധികവും അണിനിരന്നത്.
പ്രതികരിക്കാൻ ഇവിടെ എഴുതുക: