കോട്ടയം: രാഹുല്‍ഗാന്ധി കോട്ടയത്ത് പ്രചാരണത്തിന് വന്നത് ആര്‍ക്കുവേണ്ടിയാണ് ?അഥവാ ചേര്‍ത്തുപിടിച്ചത് ഏത് സ്ഥാനാര്‍ത്ഥിയെ ?, ഇതാണ് ഇപ്പോള്‍ കോട്ടയത്തെ ചോദ്യം. രാഹുല്‍ എത്തിയത് തോമസ് ചാഴികാടനെ വിജയിപ്പിക്കാന്‍ വേണ്ടിയാണെന്ന് നിര്‍ലജ്ജം അവകാശപ്പെട്ട് രംഗത്ത് വന്നിരിക്കുകയാണ് എല്‍ഡിഎഫ് മുന്നണിയിലെ കേരള കോണ്‍ഗ്രസ് എം നേതാവായ ജോസ് കെ മാണി . കേരള കോണ്‍ഗ്രസ് ഇന്‍ഡി മുന്നിലെ അവിഭാജ്യഘടകമാണെന്നും രൂപീകരണം മുതല്‍ പാലമെന്റിനു പുറത്തും അകത്തും നിന്ന് പ്രവര്‍ത്തനങ്ങള്‍ക്ക’പിന്തുണ നല്‍കിവരുന്നതാണെന്നും ജോസ് കെ മാണി പറയുന്നു. യുഡിഎഫ് സ്ഥാനാര്‍ത്ഥി ഫ്രാന്‍സിസ് ജോര്‍ജിന്റെ ചിഹ്നമോ പേരോ പോലും രാഹുല്‍ ഗാന്ധി കോട്ടയത്ത് പറഞ്ഞില്ലെന്നാണ് ജോസ് കെ മാണിയുടെ സാക്ഷ്യം. സ്ഥാനാര്‍ത്ഥിയെ ഒന്ന് ചേര്‍ത്ത് പിടിക്കാന്‍ പോലും രാഹുല്‍ തയ്യാറായില്ലത്രെ.
എന്നാല്‍ തന്നെ ചേര്‍ത്തുപിടിച്ചാണ് രാഹുല്‍ഗാന്ധി സംസാരിച്ചതെന്നും ആരുടെ വിജയത്തിനാണ് അദ്ദേഹം കോട്ടയത്ത് എത്തിയതെന്ന് എല്ലാവര്‍ക്കും അറിയാമെന്നും ഫ്രാന്‍സിസ് ജോര്‍ജ് പ്രതികരിക്കുന്നു.
അതേസമയം മുഖ്യമന്ത്രിയെ മനുഷ്യത്വം ഇല്ലാത്ത വിധം രാഹുല്‍ഗാന്ധി വിമര്‍ശിച്ചപ്പോള്‍ ജോസ് കെ മാണി എവിടെയായിരുന്നുവെന്ന് പ്രസംഗം പരിഭാഷപ്പെടുത്തിയ തിരുവഞ്ചൂര്‍ രാധാകൃഷ്ണന്‍ എംഎല്‍എ ചോദിച്ചു . ഇക്കാര്യത്തില്‍ ജോസ് മുഖ്യമന്ത്രിക്കൊപ്പം ആണോ രാഹുല്‍ഗാന്ധിക്കൊപ്പം ആണോ എന്ന് വ്യക്തമാക്കണം. വയനാട്ടില്‍ കേരള കോണ്‍ഗ്രസ് പിന്തുണയ്‌ക്കുന്നത് രാഹുല്‍ ഗാന്ധിയെയോ അതോ എല്‍ഡിഎഫിയിലെ ആനിരാജയെയോ എന്ന് വ്യക്തമാക്കണമെന്ന ആവശ്യമായി മാണി സി.കാപ്പന്‍ എം.എല്‍ എ യും രംഗത്തെത്തിയിട്ടുണ്ട്.
പ്രതികരിക്കാൻ ഇവിടെ എഴുതുക: