ലോക്‌സഭാ തെരഞ്ഞെടുപ്പ്: എല്ലാവരും വോട്ടുചെയ്യണം, ലോകത്തിലെ തന്നെ ഏറ്റവും ഉയരം കുറഞ്ഞ സ്ത്രീയും വോട്ട് രേഖപ്പെടുത്തി

നാഗ്പൂര്‍ (മഹാരാഷ്‌ട്ര): ലോകത്തിലെ ഏറ്റവും ഉയരം കുറഞ്ഞ സ്ത്രീ ജ്യോതി ആംഗെ വെള്ളിയാഴ്ച നാഗ്പൂരിലെ പോളിംഗ് ബൂത്തില്‍ വോട്ട് ചെയ്തു. എല്ലാവരും വീടിന് പുറത്തുവന്ന് വന്‍തോതില്‍ വോട്ട് രേഖപ്പെടുത്തണമെന്ന് വോട്ട് ചെയ്തതിന് ശേഷം ആംഗെ പറഞ്ഞു.

ഇന്ന് വോട്ട് ചെയ്തതിനാല്‍ എനിക്ക് ലളരെ സന്തോഷമുണ്ട്. വോട്ട് നമ്മുടെ കടമയാണെന്ന് എല്ലാവരോടും പറയാന്‍ ഞാന്‍ ആഗ്രഹിക്കുന്നു, അതിനാല്‍ നമ്മള്‍ വോട്ട് ചെയ്യണം. വോട്ടുചെയ്യാന്‍ വന്‍തോതില്‍ എത്തണമെന്ന് ഞാന്‍ നിങ്ങളോട് അഭ്യര്‍ത്ഥിക്കുന്നുവെന്ന് അവര്‍ പറഞ്ഞു.

ഗിന്നസ് വേള്‍ഡ് റെക്കോര്‍ഡ് പ്രകാരം, നാഗ്പൂരില്‍ നിന്നുള്ള ജ്യോതി, 1993 ഡിസംബര്‍ 16 നാണ് ജനിച്ചത്. വെറും 62.8 സെന്റീമീറ്റര്‍ (24.7 ഇഞ്ച്) ഉയരമുള്ള അവര്‍ ലോകത്തിലെ ഏറ്റവും ഉയരം കുറഞ്ഞ സ്ത്രീ എന്ന റെക്കോര്‍ഡ് സ്വന്തമാക്കി വ്യക്തിയാണ്.

2024ലെ ലോക്സഭാ തിരഞ്ഞെടുപ്പിന്റെ ആദ്യഘട്ട വോട്ടെടുപ്പ് 21 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി വ്യാപിച്ചുകിടക്കുന്ന 102 പാര്‍ലമെന്റ് മണ്ഡലങ്ങളിലായി വെള്ളിയാഴ്ച രാവിലെ 7:00 മണിക്ക് ആരംഭിച്ചു. വൈകിട്ട് ആറിന് വോട്ടെടുപ്പ് അവസാനിക്കും.