തിരൂരങ്ങാടി: വയനാട്ടില്‍ വിനോദയാത്രയ്ക്കിടെ കാവുമന്ദം ചെന്നലോട് മൈലാടന്‍കുന്നില്‍ കാര്‍ താഴ്ചയിലേക്ക് മറിഞ്ഞുള്ള അപകടത്തില്‍ മരണം രണ്ടായി. പരിക്കേറ്റ കുട്ടികളില്‍ ഒരാള്‍ മരിച്ചു. ഇന്നലെ മരണമടഞ്ഞ തിരൂരങ്ങാടി ചന്തപ്പടി സ്വദേശി കൊളപ്പുറം ഗവ. എച്ച്.എസ്.എസിലെ അറബി അദ്ധ്യാപകന്‍ ഗുല്‍സാറിന്റെ (44) അനുജന്‍ ജാസിറിന്റെ മകള്‍ ഫില്‍സ (12) ആണ് മരിച്ചത്.
കുട്ടികള്‍ ഉള്‍പ്പെടെ അപകടത്തില്‍ അഞ്ചുപേര്‍ക്ക് ഗുരുതര പരിക്കേറ്റിരുന്നു.ഗുല്‍സാറിന്റെ മക്കളായ നസീം മുഹമ്മദ്(17), ലഹിന്‍ ഹംസ (3), ലൈഫ മറിയം (7), ഗുല്‍സാറിന്റെ സഹോദരി നദീറയുടെ മകള്‍ ഫില്‍ദ (12) എന്നിവര്‍ക്കും ഗുല്‍സാറിന്റെ ഭാര്യ ജസീലയ്‌ക്കും പരിക്കുണ്ട്. ശനിയാഴ്ച ഉച്ചയ്‌ക്കായിരുന്നു അപകടം. പരിക്കേറ്റവരെ കോഴിക്കോട് മെഡിക്കല്‍ കോളേജിലും വയനാട്ടിലെ സ്വകാര്യ മെഡിക്കല്‍ കോളേജിലുമാണ് പ്രവേശിപ്പിച്ചത്. എല്ലാവര്‍ക്കും തലയ്‌ക്കാണ് പരിക്ക്.
ഗുല്‍സാറാണ് കാര്‍ ഓടിച്ചത്. ഉറങ്ങിപ്പോയതാകാം അപകടത്തിന് കാരണമെന്നാണ് നിഗമനം.ഉംറ നിര്‍വഹിച്ച ശേഷം പെരുന്നാള്‍ രാത്രിയാണ് ഗുല്‍സാര്‍ നാട്ടില്‍ മടങ്ങിയെത്തിയത്. ഇന്നലെ രാവിലെ കുടുംബത്തിനൊപ്പം രണ്ടു കാറുകളിലായാണ് വയനാട്ടിലേക്ക് യാത്ര പോയത്.ഗുല്‍സാറിന്റെ മറ്റൊരു കുട്ടി രണ്ടാമത്തെ വാഹനത്തിലുണ്ടായിരുന്നു.
പ്രതികരിക്കാൻ ഇവിടെ എഴുതുക: