പണം വാങ്ങി കബളിപ്പിച്ചു’; മഞ്ഞുമ്മൽ ബോയ്സ് നിർമാതാക്കളുടെ ബാങ്ക് അക്കൗണ്ടുകൾ മരവിപ്പിച്ച് കോടതി

മഞ്ഞുമ്മൽ ബോയ്സ്’സിനിമയുടെ നിർമാതാക്കളുടെ ബാങ്ക് അക്കൗണ്ടുകൾ(bank accounts) മരവിപ്പിക്കാൻ ഉത്തരവ്. നിർമാണ കമ്പനിയായ പറവ ഫിലിംസിന്റെയും പാർട്ണർ ഷോൺ ആന്റണിയുടെയും 40 കോടിയുടെ ബാങ്ക് അക്കൗണ്ടാണ് മരവിപ്പിച്ചത്. അരൂർ സ്വദേശി സിറാജ് സമർപ്പിച്ച ഹർജിയിലാണ് എറണാകുളം സബ് കോടതിയുടെ ഉത്തരവ്. സിനിമയ്‌ക്കായി 7 കോടി രൂപ മുടക്കിയിട്ടു ലാഭവിഹിതമോ മുടക്കുമുതലോ നൽകിയില്ലെന്നായിരുന്നു പരാതി.ചിത്രം ഇതിനോടകം ബോക്സ് ഓഫീസിൽ കലക്ഷനിൽ റെക്കോർഡുകൾ സൃഷ്ടിച്ചിട്ടുണ്ട്.

ചിത്രത്തിന്റെ നിർമാണത്തിന് താൻ 7 കോടി മുതൽ മുടക്കിയെന്നാണു സിറാജ് വലിയത്തറ ഹമീദ് ഹർജിയിൽ പറയുന്നത്. 40 ശതമാനം ലാഭവിഹിതം വാഗ്ദാനം ചെയ്തിരുന്നു. എന്നാൽ നിർമാതാക്കൾ പണം കൈപ്പറ്റിയ ശേഷം ലാഭമോ മുതൽമുടക്കോ നൽകാതെ കബളിപ്പിച്ച‌െന്നാണു ഹർജി. ചിത്രം ആഗോള തലത്തിൽ ഇതുവരെ 220 കോടി രൂപ കളക്‌ഷൻ നേടിയിട്ടുണ്ടെന്നും ഒടിടി പ്ലാറ്റ്‌ഫോമുകൾ മുഖേന 20 കോടിയോളം രൂപ നേടിയിട്ടുണ്ടെന്നും സിറാജ് പറയുന്നു. ഹർജി പരിഗണിച്ച കോടതി ചിത്രത്തിന്റെ നിർമാതാക്കളായ സൗബിൻ ഷാഹിർ, ബാബു ഷാഹിർ എന്നിവർക്കു കോടതി നോട്ടിസ് അയച്ചിട്ടുണ്ട്.

ഫെബ്രുവരി 22നാണ് ചിത്രം തിയറ്ററുകളിലെത്തിയത്. തുടക്കത്തിലേ കുതിച്ച ചിത്രം മലയാള സിനിമയുടെ ചരിത്രത്തിൽ തന്നെ 200 കോടി ക്ലബിൽ ഇടം നേടുന്ന ആദ്യ ചിത്രമെന്ന നേട്ടം കൈവരിച്ചു. തമിഴ്നാട്ടിലും ചിത്രം അതിവേഗം പ്രസിദ്ധി നേടി. മൊഴിമാറ്റം ചെയ്യാതെ തന്നെ തമിഴ്നാട്ടിൽ 50 കോടി നേടുന്ന ആദ്യ ഇതരഭാഷാ ചിത്രമായി മഞ്ഞുമ്മൽ ബോയ്സ് മാറി. കേരളത്തിലും തമിഴ്‌നാട്ടിലുമായാണ് ഷൂട്ടിങ് പൂർത്തിയാക്കിയത്.