ന്യൂദല്ഹി : കണ്ണൂര് സ്വദേശി യുവാവിനെതിരെ മുന് കാമുകിയുടെ ബലാംത്സംഗ കേസ് സവിശേഷാധികാരം ഉപയോഗിച്ച് സുപ്രീം കോടതി റദ്ദാക്കി. 142ാം വകുപ്പ് ഉപയോഗിച്ചാണ് കേസ് റദ്ദാക്കിയത്.
യുവതി മറ്റൊരു വിവാഹം കഴിച്ചതും പരാതിയുമായി മുന്നോട്ടുപോകാന് താല്പര്യമില്ലെന്ന് അറിയിച്ചതും പരിഗണിച്ചാണ് സുപ്രീം കോടതി നടപടി. ചെന്നൈയില് പഠനകാലത്തു നൂറ്റിയമ്പതിലേറെ തവണ പീഡിപ്പിച്ചെന്ന് കാട്ടിയാണ് മലയാളി പെണ്കുട്ടി പരാതി നല്കിയത്. ചെങ്കല്പ്പേട്ട് സെഷന്സ് കോടതി കേസിലെ വിചാരണ തുടങ്ങാനിരിക്കുകയായിരുന്നു.
2006-2010 കാലത്തു ചെന്നൈയില് എന്ജിനീയറിംഗിനു പഠിച്ചിരുന്നവരാണ് ഇരുവരും.തമ്മില് പ്രണയത്തിലുമായിരുന്നു. പഠന ശേഷം യുവാവിനു ബെംഗളൂരുവില് ജോലി ലഭിച്ചു. യുവതിക്കു ജോലി ചെന്നൈയിലും ജോലി കിട്ടി.ഇതിന് ശേഷവും ബന്ധം തുടര്ന്നെങ്കിലും യുവാവ് പിന്നീട് വിവാഹവാഗ്ദാനത്തില്നിന്ന് പിന്മാറി. ഇതോടെയാണ് പെണ്കുട്ടി തമിഴ്നാട് പൊലീസിനെ സമീപിച്ചത്. തുടര്ന്ന് ഈ പെണ്കുട്ടിയെത്തന്നെ വിവാഹം ചെയ്യാമെന്ന് പൊലീസിന്റെ സാന്നിധ്യത്തില് യുവാവും കുടുംബവും എഴുതി നല്കിയെങ്കിലും പിന്നീട് അതില്നിന്ന് പിന്നാക്കം പോയി. തുടര്ന്ന് പൊലീസ് കേസുമായി മുന്നോട്ടുപോയി.
ഇതിനിടെ ദുബായിലേക്ക് ജോലിക്കായി പോയ യുവാവിനെ റെഡ് കോര്ണര് നോട്ടിസ് പുറപ്പെടുവിച്ച് പൊലീസ് അറസ്റ്റ് ചെയ്തു. യുവാവ് മദ്രാസ് ഹൈക്കോടതിയില് ഹര്ജി നല്കിയെങ്കിലും ഗുണമുണ്ടായില്ല. കേസ് തുടരുന്നതില് താല്പര്യമില്ലെന്ന് യുവതി അറിയിച്ചെങ്കിലും, കേസിന്റെ ഗൗരവ സ്വഭാവം പരിഗണിച്ചാണ് മദ്രാസ് ഹൈക്കോടതി ഹര്ജി അനുവദിക്കാതിരുന്നത്. ഇതോടെയാണ് യുവാവ് സുപ്രീം കോടതിയെ സമീപിച്ചത്.
