തിരുവനന്തപുരം: അരുണാചൽ പ്രദേശിലെ മലയാളികളുടെ മരണത്തിൽ കൂടുതൽ വിവരങ്ങൾ പുറത്ത്. ഡോൺബോസ്കോ മെയിൽ ഐഡിക്ക് പിന്നിൽ ആര്യയുടേതാണെന്ന് പോലീസ് കണ്ടെത്തി. വിചിത്രവിശ്വാസത്തേക്കുറിച്ച് സംസാരിക്കാനായി തയാറാക്കിയതാണ് ഈ മെയിൽ ഐഡി.
അന്യഗ്രഹ ജീവിതത്തെയും ‘മിതി’ യെയും സംബന്ധിച്ച വിവരങ്ങളാണ് ഈ ഐഡിയിലുള്ള മെയിലില് നിന്നും ലഭിച്ചിരുന്നത്. ഡോൺബോസ്കോ എന്ന മെയിലിൽ നിന്നും ലഭിച്ച സന്ദേശം ചിലർക്ക് ആര്യ ഫോർവേഡ് ചെയ്തിരുന്നു. ഇതിൽ സൂചിപ്പിച്ചിട്ടുള്ള കല്ലുകള് കഴിഞ്ഞ ദിവസം കാറിൽ നിന്നും കണ്ടെത്തിയിരുന്നു. മരിച്ചവരുടെ ലാപ്ടോപ്പും കംപ്യൂട്ടറും അടക്കമുള്ളവ പരിശോധനയ്ക്കായി അന്വേഷണ സംഘം ശേഖരിച്ചിട്ടുണ്ട്.
ആര്യയുടെ ലാപ് ടോപ്പിൽ നിന്നും നേരത്തെ ലഭിച്ച ചിത്രങ്ങളിലുള്ള വസ്തുക്കൾ തന്നെയാണ് കാറിൽ നിന്നും കണ്ടെത്തിയതെന്ന് പോലീസ് സ്ഥിരീകരിച്ചിരുന്നു. ഇതോടെയാണ് അന്യഗ്രഹ ജീവിതത്തിലേക്കുള്ള ആഭിചാര കർമ്മത്തിന്റെ സാധ്യതകള് പോലീസ് കൂടുതൽ ഉറപ്പിക്കുന്നത്. ജീവനൊടുക്കുന്നതിനു മുൻപ് ഇവർ ഓൺലൈൻ വഴി മാറ്റരെങ്കിലുമായി സംവദിച്ചിട്ടുണ്ടോ എന്നുള്ളതടക്കം പോലീസ് പരിശോധിച്ച് വരികയാണ്.
അന്യഗ്രഹ ജീവിതമെന്ന വിചിത്ര വിശ്വാസത്തിന് തുടക്കമിട്ടത് നവീൻ ആമെന്നും പോലീസ് സ്ഥിരീകരിച്ചു. ഒരു വൈദികനടക്കം അഞ്ച് സുഹൃത്തുക്കളെ തന്റെ വിചിത്രചിന്തകളുടെ ഭാഗമാക്കാനും നവീൻ ശ്രമിച്ചുവെന്ന് പോലീസ് കണ്ടെത്തി. അരുണാചൽ പ്രദേശിലെ ഗ്രാമങ്ങളിലെത്തി മൂവരും ധ്യാനത്തിൽ പങ്കെടുത്തിരുന്നെന്നും പോലീസ് പറഞ്ഞു. മരണത്തിനു ശേഷം അന്യഗ്രഹ ജീവിതം ലഭിക്കുമെന്ന വിശ്വാസമാണ് നവീനിന്റെയും ദേവിയുടെയും ആര്യയുടെയും മരണത്തിനു പിന്നിലെന്നാണ് പോലീസിന്റെ പ്രാഥമിക നിഗമനം.
അന്യഗ്രഹ ജീവികളുമായി ബന്ധപ്പെട്ട വെബ്സൈറ്റുകളും പുസ്തകങ്ങളും മൂന്നുപേരും വായിക്കുകയും പരസ്പരം വിവരങ്ങൾ കൈമാറുകയും ചെയ്തിരുന്നു. ഭൂമിയിലേക്കാൾ സന്തോഷകരമായ ജീവിതമാണോ മറ്റു ഗ്രഹങ്ങളിലേതെന്നു കണ്ടെത്താനാണു ഇവർ ശ്രമിച്ചത്. ആ സംശയം സാധൂകരിക്കുന്നതാണ് ആത്മഹത്യ കുറിപ്പും.
