കോഴിക്കോട് : പുനര്വിവാഹം വാഗ്ദാനം ചെയ്ത് ഡോക്ടറില് നിന്നും സ്വര്ണവും പണവും തട്ടിയെടുത്തെന്ന് പരാതി.നഗരത്തിലെ ഹോട്ടല് മുറിയില് വച്ച് വിവാഹ ചടങ്ങ് നടത്തിയ ശേഷം വധു ഉള്പ്പെടെയുള്ള അഞ്ചംഗ സംഘം കടന്നു കളഞ്ഞെന്നാണ് നടക്കാവ് പൊലീസില് പ പരാതി നല്കിയത്.
കോഴിക്കോട് മെഡിക്കല് കോളേജില് നിന്നും വിരമിച്ച ഡോക്ടര് പുനര്വിവാഹത്തിനായി പത്രത്തില് പരസ്യം നല്കിയിരുന്നു. ഇതിന് പിന്നാലെ കാസര്ഗോഡ് സ്വദേശിനി ഉള്പ്പെടെ അഞ്ചംഗ സംഘം ഫോണില് ബന്ധപ്പെട്ടു.കഴിഞ്ഞദിവസം കോഴിക്കോട് റെയില്വേ സ്റ്റേഷന് സമീപം ഹോട്ടലില് മുറിയെടുത്ത് വിവാഹ ചടങ്ങുകളും നടത്തി. യുവതിയുടെ ബന്ധുക്കളെന്ന് പേരില് ചിലരും ചടങ്ങില് പങ്കെടുത്തിരുന്നു.
തുടര്ന്ന് നവദമ്പതികള്ക്ക് ഒന്നിച്ചു താമസിക്കാന് വാടക വീട് തരപ്പെടുത്താമെന്ന് പറഞ്ഞ് സംഘം 5 ലക്ഷം രൂപ ഡോക്ടറില് നിന്നും കൈവശപ്പെടുത്തുകയായിരുന്നു.പുറമെ മൊബൈല് ഫോണും ലാപ്ടോപ്പും സംഘം കൈക്കലാക്കി.തുടര്ന്ന് ഫോണ് സ്വിച്ച് ഓഫ് ആക്കിയശേഷം സംഘം കടന്നു കളഞ്ഞുവെന്നാണ് പരാതി. ഹോട്ടലിലെ ഉള്പ്പെടെ സിസിടിവികള് കേന്ദ്രീകരിച്ചാണ് പൊലീസ് അന്വേഷണം പുരോഗമിക്കുന്നത്.
