ആനപ്പുറത്തിരിക്കുമ്പോള്‍ നായയെ പേടിക്കണോ! പ്രചാരണ യോഗങ്ങളില്‍ മുഖ്യമന്ത്രിക്കൊപ്പമുണ്ട് തല്ലുകേസിലെ പ്രതി

കോട്ടയം: ഇതെന്തൊരു കോമഡിയാണ്! ചില സിനിമകളില്‍ ഗുണ്ടയുടെ ബലത്തില്‍ തെരുവിലൂടെ നടക്കുന്ന, ഉപനായക കഥാപാത്രത്തെപ്പോലെ ഒരു കേസിലെ പിടികിട്ടാപ്പുുള്ളിയെയും കൊണ്ട് മുഖ്യമന്ത്രി നാട് നീളെ നെഞ്ചുവിരിച്ച് നടക്കുന്നു! ഹാജരാകാന്‍ ക്രൈംബ്രാഞ്ച് ആവശ്യപ്പെട്ടിട്ട് കൂട്ടാക്കാതെ സമയമായില്ലെന്ന നിലയ്‌ക്കു നടക്കുന്ന ഗണ്‍മാന്‍ അനില്‍കുമാറാണ് ഇന്നലെ മുഖ്യമന്ത്രിക്കൊപ്പം ആലപ്പുഴ അടക്കമുള്ള ജില്ലകളിലൂടെ സഞ്ചരിച്ചത്. രാവിലെ പത്രസമ്മേളനം നടത്തിയപ്പോഴും തെരഞ്ഞെടുപ്പ് പ്രചാരണ യോഗങ്ങളിലുമെല്ലാം മുഖ്യമന്ത്രിയോട് ചേര്‍ന്ന് അനില്‍കുമാര്‍ ഉണ്ടായിരുന്നു. പാവം ജില്ലാ ക്രൈം ബ്രാഞ്ച് ഉദ്യോഗസ്ഥര്‍ ഇതു കണ്ടിട്ടും മുഖം തിരിച്ചു നിന്നു. അല്ലാതെ എന്തു ചെയ്യാന്‍. മുഖ്യമന്ത്രിയുടെ ഒപ്പം സഞ്ചരിക്കുന്ന ആളെ എങ്ങനെ പിടിക്കും, എങ്ങനെ ചോദ്യം ചെയ്യും.
നവകേരളസദസ്സിനിടെ മുഖ്യമന്ത്രിയെ കരിംകൊടി കാണിക്കാനായി എത്തിയ യൂത്ത് കോണ്‍ഗ്രസുകാരെ അകമ്പടി വാഹനത്തില്‍ നിന്ന് ചാടിയിറങ്ങി അടിച്ചു പരത്തിയ കേസിലെ പ്രതിയാണ് ഗണ്‍മാന്‍ അനില്‍കുമാര്‍. പരാതിയെത്തുടര്‍ന്ന് പോലീസ് കേസെടുത്തെങ്കിലും ചോദ്യം ചെയ്യാന്‍ പോലും തയ്യാറായില്ല. വീണ്ടും പരാതിപ്പെട്ടപ്പോള്‍ കേസ് ക്രൈംബ്രാഞ്ചിനെ ഏല്‍പ്പിച്ചു. എന്നാല്‍ ക്രൈംബ്രാഞ്ച് ചോദ്യം ചെയ്യലിന് ഹാജരാവാന്‍ ആവശ്യപ്പെട്ടെങ്കിലും അനില്‍ മൈന്‍ഡു ചെയ്തില്ല. ആനപ്പുറത്തിരിക്കുമ്പോള്‍ നായയെ പേടിക്കണോ!