ബലൂചിസ്ഥാന്: വെള്ളിയാഴ്ച രാത്രിയും ശനിയാഴ്ചയുമായി പാകിസ്ഥാനിലെ ഖൈബര് പഖ്തൂണ്ഖ്വയിലും ബലൂചിസ്ഥാനിലും വ്യത്യസ്ത സംഭവങ്ങളില് ആറ് സുരക്ഷാ ഉദ്യോഗസ്ഥരും 12 ഭീകരരും കൊല്ലപ്പെട്ടതായി ഡോണ് റിപ്പോര്ട്ട് ചെയ്തു. ആറ് സുരക്ഷാ ഉദ്യോഗസ്ഥരില് ഒരു ഡെപ്യൂട്ടി പോലീസ് സൂപ്രണ്ടും (ഡിഎസ്പി) ഉള്പ്പെടുന്നു.
ഒരു സംഭവത്തില്, വെള്ളിയാഴ്ച ദേര ഇസ്മായില് ഖാന് ജില്ലയിലെ കുലാച്ചി തഹ്സിലിലെ കോട് സുല്ത്താന് പ്രദേശത്ത് നടത്തിയ രഹസ്യാന്വേഷണ അധിഷ്ഠിത ഓപ്പറേഷനില് സുരക്ഷാ സേനയുമായുണ്ടായ ഏറ്റുമുട്ടലില് എട്ട് ഭീകരര് കൊല്ലപ്പെട്ടതായി ഇന്റര് സര്വീസസ് പബ്ലിക് റിലേഷന്സ് (ഐഎസ്പിആര്) അറിയിച്ചു.
കോട് സുല്ത്താനില് ഭീകരരുടെ സാന്നിധ്യം റിപ്പോര്ട്ട് ചെയ്തതിന്റെ അടിസ്ഥാനത്തിലാണ് സുരക്ഷാ സേന ഓപ്പറേഷന് നടത്തിയതെന്നും ഐഎസ്പിആര് വ്യക്തമാക്കി. സുരക്ഷാ സേനയ്ക്കെതിരായ നിരവധി പ്രവര്ത്തനങ്ങളിലും സാധാരണക്കാരെ ലക്ഷ്യമിട്ടുള്ള കൊലപാതകങ്ങളിലും തീവ്രവാദികള് സജീവമായി പങ്കെടുത്തതായി ഡോണ് റിപ്പോര്ട്ട് ചെയ്തു. കൂടാതെ, ഇവരില് നിന്ന് ആയുധങ്ങളും വെടിക്കോപ്പുകളും സ്ഫോടക വസ്തുക്കളും സുരക്ഷാ സേന കണ്ടെടുത്തു.
