ടൊറന്റോ: ഇന്ത്യയുടെ വിജയപ്രതീക്ഷയായിരുന്ന പ്രജ്ഞാനന്ദയ്ക്ക് ഇന്ത്യന് താരം ഗുകേഷില് നിന്നും തിരിച്ചടി. കാന്ഡിഡേറ്റ്സ് ചെസ്ലിലെ രണ്ടാം റൗണ്ടിലാണ് പ്രജ്ഞാനന്ദ തോല്വി ഏറ്റുവാങ്ങിയത്. ഇതോടെ രണ്ടു റൗണ്ടുകളില് നിന്നും ഗുകേഷ് ഒന്നര പോയിന്റ് നേടിയപ്പോള് പ്രജ്ഞാനന്ദയ്ക്ക് അരപോയിന്റേ ഉള്ളൂ.
ഇന്ത്യന് താരം വിദിത് ഗുജറാത്തി ലോക മൂന്നാം നമ്പര് താരം നകാമുറയെ അട്ടിമറിച്ചതാണ് ടൊറന്റോയില് നിന്നുള്ള മറ്റൊരു വാര്ത്ത. വിദിത് ഗുജറാത്തിയ്ക്കും ഇതോടെ ഒന്നര പോയിന്റായി. റുയ് ലോപസ് ഓപ്പണിങ്ങില് കളിച്ച വിദിത് ഗുജറാത്തി ആനയെ(ബിഷപ്) ബലികൊടുത്തത് നകാമുറയെ ഞെട്ടിച്ചു. തുടര്ന്ന് ആക്രമിച്ച് കളിച്ച വിദിത് ഗുജറാത്തി വിജയം കൈപ്പിടിയിലൊതുക്കി.
മറ്റൊരു മത്സരത്തില്, അലിറെസ ഫിറുജ്സെയ്ക്കെതിരെ നെപോമ്നിയാച്ചി വിജയം നേടി. ലോകചാമ്പ്യനെ നേരിടാനുള്ള വിജയിയെ കണ്ടെത്താനുള്ളതാണ് കാന്ഡിഡേറ്റ്സ് ചെസ് ടൂര്ണ്ണമെന്റ്. എട്ട് ഗ്രാന്റ് മാസ്റ്റര്മാരാണ് പുരുഷവിഭാഗത്തില് മാറ്റുരയ്ക്കുന്നത്. ഇതിലെ വിജയി 2023ലെ ലോകചാമ്പ്യനായ ചൈനീസ് താരം ഡിങ് ലിറനെ നേരിടും.
