ആലപ്പുഴ: കഴിഞ്ഞ ദിവസം ആലപ്പുഴയിൽ ഉണ്ടായ കടൽ ക്ഷോഭം ആശങ്കപ്പെടുത്തുന്നതാണെന്ന് ശോഭ സുരേന്ദ്രൻ. ഇതുമായി ബന്ധപ്പെട്ട് ശാശ്വത
പരിഹാരത്തിനായി കേന്ദ്ര ഫിഷറീസ് ക്യാബിനറ്റ് മന്ത്രി പര്ഷോത്തം രൂപാലയുടെ സെക്രട്ടറി വിവേക് പി ഭട്ടുമായി ഉടനടി ബന്ധപെട്ടു കാര്യങ്ങൾ ധരിപ്പിച്ചു എന്നും ശോഭ സുരേന്ദ്രൻ പറഞ്ഞു.
അശാസ്ത്രീയമായ നിർമ്മാണങ്ങൾ നിർത്തലാക്കി പകരം മത്സ്യത്തൊഴിലാളികളുടെയും കടലോരമേഖലകളിൽ വസിക്കുന്നവരുടെയും ദീർഘകാല ആവശ്യമായ പുലിമുട്ടോടുകൂടിയ കടൽ ഭിത്തി നിർമ്മാണം ശാസ്ത്രീയമായ രീതിയിൽ പൂർത്തീകരിക്കേണ്ടതിന്റെ ആവശ്യകത അദ്ദേഹത്തെ ബോധ്യപ്പെടുത്തുകയും ചെയ്തു. ഉദ്യോഗസ്ഥരുമായി ചർച്ച ചെയ്തു വേണ്ട കാര്യങ്ങൾ സ്വീകരിക്കാം എന്ന് അദ്ദേഹം ഉറപ്പ് നൽകിയിട്ടുമുണ്ട് .
പ്രളയകാലത്ത് ദൈവദൂതരെ പോലെ ദുരന്തമുഖത്ത് രക്ഷാപ്രവർത്തനം നടത്തിയ കടലിന്റെ മക്കളുടെ സംരക്ഷണം സർക്കാരിന്റെ ഉത്തരവാദിത്വം ആണെന്നും മത്സ്യത്തൊഴിലാളികളുടെ ദുരിതവുമായി ബന്ധപ്പെട്ട് കൃത്യനിർവഹണത്തിൽ വീഴ്ച വരുത്തുന്ന ഉദ്യോഗസ്ഥർ കനത്ത വില നൽകേണ്ടിവരുമെന്നും അവർക്കെതിരെ അടിയന്തിര നടപടികൾ സ്വീകരിക്കുമെന്നും ശോഭ സുരേന്ദ്രൻ പറഞ്ഞു.
