അമ്പലപ്പുഴ: എന്ഡിഎ സ്ഥാനാര്ത്ഥി ശോഭാ സുരേന്ദ്രന് അമ്പലപ്പുഴയുടെ വിവിധ പ്രദേശങ്ങളില് സ്നേഹോഷ്മള വരവേല്പ്പ്. സ്ഥാനാര്ത്ഥിയെ ആശീര്വദിക്കാനും, ആശംസയര്പ്പിക്കാനും, കക്ഷി രാഷ്ട്രീയ മതഭേദമന്യേ ജനങ്ങളെത്തി. എന്ഡിഎ സര്ക്കാരിന്റെ വികസനനേട്ടങ്ങള് ഉയര്ത്തികാട്ടിയും, താന് ജനപ്രതിനിധിയായാല് ചെയ്യുന്ന കാര്യങ്ങള് അക്കമിട്ട് നിരത്തി ജനങ്ങളോട് സംവദിച്ചുമാണ് ശോഭാ സുരേന്ദ്രന്റെ പ്രചാരണം മുന്നേറുന്നത്.
ബിജെപി ജില്ലാ ജനറല് സെക്രട്ടറിയും എന്എസ്എസ് കരയോഗം പ്രസിഡന്റുമായിരുന്ന അന്തരിച്ച ഡി. കൃഷ്ണന്റെയും മഹിളാമോര്ച്ച മുന് ജില്ലാ ജനറല് സെക്രട്ടറിയുമായ ഭാനുമതി കൃഷ്ണന്റെയും വീട് സന്ദര്ശിച്ച് പ്രഭാത ഭക്ഷണം കഴിച്ചു. അഖില കേരള ഉള്ളാട മഹാസഭ പ്രസിഡന്റ് ഉത്തമന്റെ വീട് സന്ദര്ശിച്ച് അനുഗ്രഹം തേടി.
മഹാസഭ ജില്ലാ സെക്രട്ടറി ജി. വേണുവും ഉത്തമന്റെ വസതിയില് ഉണ്ടായിരുന്നു. കുറച്ചു നേരം ഇവിടെ ചെലവഴിച്ച ശേഷമാണ് സ്ഥാനാര്ത്ഥി മടങ്ങിയത്. എന്എസ്എസ് അമ്പലപ്പുഴ താലൂക്ക് യൂണിയന് പ്രസിഡന്റ് പി. രാജഗോപാല പണിക്കരുടെ വീട് സന്ദര്ശിച്ച് അനുഗ്രഹം തേടി. ഇടയ്ക്ക് ആലപ്പുഴയില് ഒരു പരിപാടിക്ക് എത്തിയ എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശനെ സന്ദര്ശിച്ച് അനുഗ്രഹം വാങ്ങി.
പുറക്കാട് ശ്രീ നാഗയക്ഷി ക്ഷേത്രത്തില് ദര്ശനം നടത്തി. മറ്റു പ്രമുഖരെ സന്ദര്ശിച്ച ശോഷം പുറക്കാട് പുന്തല അഴിക്കകം മധുവിന്റെ വസതിയിലായിരുന്നു ഉച്ചഭക്ഷണം. ഹരിപ്പാട് കവറാട്ട് ക്ഷേത്രത്തിന് സമീപം ശ്രീനാരായണ പ്രഭാഷണവും ധ്യാനവും നടക്കുന്ന ചടങ്ങില് പങ്കെടുത്തു. വൈകിട്ട് ബിഡിജെഎസ് കരുനാഗപ്പള്ളി മണ്ഡലം കണ്വന്ഷനില് പങ്കെടുത്തു.
