ജനങ്ങളുടെ അഭിലാഷങ്ങൾ രാജ്യത്തിന്റെ വികസനവുമായി ബന്ധപ്പെട്ടിരിക്കുന്നു : രാജ്‌നാഥ് സിംഗ്

ന്യൂദൽഹി: ലോക്‌സഭാ തെരഞ്ഞെടുപ്പിൽ ബിജെപിയുടെ നേതൃത്വത്തിലുള്ള എൻഡിഎ 400-ലധികം സീറ്റുകൾ എന്ന ലക്ഷ്യം കൈവരിക്കുമെന്ന് ആത്മവിശ്വാസം പ്രകടിപ്പിച്ച് കേന്ദ്രമന്ത്രി രാജ്‌നാഥ് സിംഗ്. എബിപി ന്യൂസ് ആതിഥേയത്വം വഹിച്ച ‘ശിഖർ സമ്മേളന’ത്തിൽ സംസാരിക്കവെയാണ് അദ്ദേഹം വലിയ മാർജിനിലുള്ള വിജയ പ്രതീക്ഷ പങ്കുവച്ചത്.

ജനങ്ങളുടെ അഭിലാഷങ്ങൾ ഇപ്പോൾ രാജ്യത്തിന്റെ വളർച്ചയുമായി ബന്ധപ്പെട്ടിരിക്കുന്നുവെന്നും ഏതെങ്കിലും പാർട്ടിയുമായോ വ്യക്തിയുമായോ അല്ലെന്നും അദ്ദേഹം പറഞ്ഞു. എൻഡിഎ ബീഹാറിലെ തിരഞ്ഞെടുപ്പ് തൂത്തുവാരുമെന്നും വരാനിരിക്കുന്ന തിരഞ്ഞെടുപ്പിൽ മഹാരാഷ്‌ട്രയിൽ അമ്പരപ്പിക്കുന്ന ഫലങ്ങൾ നൽകുമെന്നും അദ്ദേഹം പറഞ്ഞു.

ഏപ്രിൽ 19 മുതൽ ഏഴ് ഘട്ടങ്ങളിലായി നടക്കുന്ന പൊതുതിരഞ്ഞെടുപ്പിൽ എൻഡിഎ എങ്ങനെ 400 കടക്കുമെന്ന ബിജെപിയുടെ വിലയിരുത്തലിന് പിന്നിലെ കണക്കിനെക്കുറിച്ച് പ്രതിരോധ മന്ത്രിയോട് ചോദിച്ചപ്പോഴായിരുന്നു ഈ പ്രതികരണം.