പിന്നിലായ ശേഷം മൂന്ന് ഗോള്‍ തിരിച്ചടിച്ച് ജയിച്ച് അര്‍ജന്റീന

ലോസ് ആഞ്ചെലെസ്: കോസ്റ്റാ റിക്കയ്‌ക്കെതിരായ അന്താരാഷ്‌ട്ര ഫുട്‌ബോള്‍ സൗഹൃദ മത്സരത്തില്‍ ലോക ചാമ്പ്യന്‍മാരായ അര്‍ജന്റീനയ്‌ക്ക് തകര്‍പ്പന്‍ ജയം. ആദ്യ പകുതിയില്‍ ഒരു ഗോള്‍ പിന്നില്‍ നിന്ന ശേഷമാണ് അര്‍ജന്റീന വിജയിച്ചത്. രണ്ടാം പകുതിയില്‍ മൂന്ന് ഗോളുകളാണ് ടീം നേടിയത്.

കളിക്ക് 34 മിനിറ്റെത്തിയപ്പോള്‍ മാന്‍ഫ്രെഡ് ഉഗാള്‍ഡെയിലൂടെ കോസ്റ്റ റിക്ക മുന്നിലെത്തി. ആദ്യ പകുതി അവര്‍ സ്വന്തമാക്കുകയും ചെയ്തു. കളി രണ്ടാം പകുതിയിലേക്ക് പിരിഞ്ഞു. സൂപ്പര്‍ താരം എയ്ഞ്ചല്‍ ഡി മരിയ അര്‍ജന്റീനയ്‌ക്കായി 52-ാം മിനിറ്റില്‍ കോസ്റ്റ റിക്ക വലയില്‍ പന്തെത്തിച്ചു. കളി 1-1 സമനിലയിലായി. നാല് മിനിറ്റിനകം അടുത്തഗോളും കണ്ടെത്തി അര്‍ജന്റീന കോസ്റ്റ റിക്കയെ മറികടന്നു. മദ്ധ്യനിരതാരം അലെക്‌സിസ് മാക് അലിസ്റ്ററിലൂടെയാണ് അര്‍ജന്റീന രണ്ടാം ഗോള്‍ നേടിയത്. 77-ാം മിനിറ്റില്‍ സ്‌ട്രൈക്കര്‍ ലാട്ടരോ മാര്‍ട്ടിനെസിലൂടെ അര്‍ജന്റീന മൂന്നാം ഗോളും നേടി. ടീമിന്റെ വിജയത്തുടര്‍ച്ച തുടരുകയാണ്. കോപ്പ അമേരിക്കയ്‌ക്ക് മുമ്പ് ഇനി ജൂണ്‍ 14ന് ഗ്വാട്ടിമാലയ്‌ക്കെതിരെയുള്ള സന്നാഹ മത്സരം മാത്രമാണ് അര്‍ജന്റീനയ്‌ക്കുള്ളത്.