വെള്ളറട/തിരുവനന്തപുരം: അമ്പൂരിയില് കാട്ടുപോത്തിന്റെ ആക്രമണത്തില് വനവാസി യുവാവിന് ഗുരുതര പരിക്ക്. അമ്പൂരി ചാക്കപ്പാറ സ്വദേശി സുരേഷി (43) നെയാണ് കാട്ടുപോത്ത് ആക്രമിച്ചത്. തലയ്ക്ക് ഗുരുതരമായി പരിക്കേറ്റ സുരേഷ് കാരക്കോണം മെഡി. കോളേജ് ആശുപത്രിയില് ചികിത്സയിലാണ്. നെയ്യാര് റേഞ്ചിലെ ഫയര് പ്രൊട്ടക്ഷന് താല്ക്കാലിക വാച്ചറായ സുരേഷിനെ കാട്ടുപോത്ത് പാഞ്ഞെത്തി ഇടിച്ചു തെറിപ്പിക്കുകയായിരുന്നു.
ഞായറാഴ്ച്ച ഉച്ചയ്ക്ക് മൂന്നു മണിയോടെ കോഴിക്കാവില് വനത്തിനുള്ളിലാണ് സംഭവം നടന്നത്. ജോലിക്കിടെ കുടിവെള്ളമെടുക്കാന് പോയപ്പോഴാണ് പോത്ത് ഇടിച്ചത്. ഇതിനെ തുടര്ന്ന് ബോധം നഷ്ടപ്പെട്ടു. പിന്നീട് രാത്രി ബോധം വന്നപ്പോള് സുരേഷ് തന്നെയാണ് ഭാര്യയെ ഫോണില് വിളിച്ച് വിവരം പറഞ്ഞത്.
