മലപ്പുറം രണ്ടരവയസ്സുകാരിയായ മകളെ ശരീരത്തിലും തലയിലും മാരകമായ മുറിവുകള്‍ ഏല്‍പിച്ച് കൊലപ്പെടുത്തിയ കേസില്‍ പിതാവ് ഫായിസിനെ പൊലീസ് അറസ്റ്റ് ചെയ്തു. പിതാവ് മുഹമ്മദ് കോന്തത്തൊടിക ഫായിസിന് 24 വയസ്സേ പ്രായമുള്ളൂ.
ഭക്ഷണം അന്നനാളത്തില്‍ കുടുങ്ങി എന്ന് പറഞ്ഞ് ബന്ധുക്കളാണ് കുഞ്ഞിനെ ആശുപത്രിയില്‍ എത്തിച്ചത്. കുഞ്ഞ് മരിച്ചു. പക്ഷെ തലയ്‌ക്കും ശരീരത്തിലും ഗുരുതരമായ മുറിവുകള്‍ കണ്ടതോടെ ഡോക്ടര്‍മാര്‍ക്ക് സംശയമായി. പോസ്റ്റ് മോര്‍ട്ടം ചെയ്യണമെന്ന് ഡോക്ടര്‍മാര്‍ നിര്‍ബന്ധിച്ചു. ബന്ധുക്കള്‍ വഴങ്ങി.
അതോടെയാണ് ഞെട്ടിക്കുന്ന കൊലപാതകത്തിന്റെ ചുരുളഴിയുന്നത്. ഞായറാഴ്ച ഉച്ചയ്‌ക്ക് വീട്ടിലെത്തിയ ഫായിസ് കുഞ്ഞിനെ ക്രൂരമായി ചവിട്ടുകയും കുഞ്ഞ് അബോധാവസ്ഥയിലായിട്ടും ഉപദ്രവിക്കുകയും ചെയ്തെന്ന് കുഞ്ഞിന്റെ മാതാവ് ശഹബാനത്ത് പിന്നീട് പൊലീസുകാരോട് വെളിപ്പെടുത്തി. ഇതോടെയാണ് അറസ്റ്റുണ്ടായത്.
കുട്ടിയെ ഉപദ്രവിക്കുന്നത് കണ്ട് നിലവിളിച്ച ശഹബാനത്തിനെ മുറിയിലിട്ട് പൂട്ടി. കഴിഞ്ഞ രണ്ടാഴ്ചയായി ഇയാള്‍ കുഞ്ഞിനെ നിരന്തരം ഉപദ്രവിച്ചു വരികയായിരുന്നു.
പ്രതികരിക്കാൻ ഇവിടെ എഴുതുക: