ഉജ്ജയിൻ: മധ്യപ്രദേശിലെ ഉജ്ജയിനിലെ മഹാകാൽ ക്ഷേത്രത്തിൽ തീപിടിത്തം. തിങ്കളാഴ്ച ഭസ്മ ആരതിക്കിടെ ഉണ്ടായ തീപിടിത്തത്തിൽ സേവകർ ഉൾപ്പെടെ 14 പുരോഹിതർക്ക് പരിക്കേറ്റതായി ഉദ്യോഗസ്ഥർ അറിയിച്ചു.
പുലർച്ചെ 5.50ഓടെ ക്ഷേത്രത്തിലെ ഗർഭഗൃഹത്തിലാണ് തീപിടിത്തമുണ്ടായതെന്ന് ഉജ്ജയിൻ കളക്ടർ നീരജ് കുമാർ സിംഗ് പറഞ്ഞു. 14 വൈദികർക്ക് പൊള്ളലേറ്റു. ചിലർ ഇവിടെ ജില്ലാ ആശുപത്രിയിൽ ചികിത്സയിലാണ്, എട്ട് പേർ ഇൻഡോറിൽ ചികിത്സ തേടി. മജിസ്ട്രേറ്റ് തല അന്വേഷണത്തിന് ഉത്തരവിട്ടിട്ടുണ്ടെന്ന് കളക്ടർ പറഞ്ഞു.
ജില്ലാ പഞ്ചായത്ത് സിഇഒ മൃണാൾ മീണ, അഡീഷണൽ കലക്ടർ അനുകൂൽ ജെയിൻ എന്നിവർ ചേർന്ന് റിപ്പോർട്ട് നൽകും. മൂന്ന് ദിവസത്തിനകം സമർപ്പിക്കുമെന്നും അദ്ദേഹം പറഞ്ഞു.
