കോൺഗ്രസിനെ രക്ഷിക്കാൻ ഇന്നത്തെ നേതാക്കൾക്കാവില്ല; കെ.മുരളിധരനുള്ള പരവതാനി ഞാൻ വിരിച്ചിട്ടുണ്ട്: പത്മജ വേണുഗോപാൽ

കണ്ണൂർ: പ്രധാനമന്ത്രി നരേന്ദ്ര മോദിയുടെ വികസന പ്രവർത്തനങ്ങളും സ്ത്രീകളോട് കാണിക്കുന്ന ബഹുമാനവുമാണ് ഞാൻ ബിജെപിയിലേക്ക് വരാൻ കാരണമായതെന്ന് പദ്മജ വേണുഗോപാൽ. ഇന്നത്തെ നേതാക്കളെ കൊണ്ട് കോൺഗ്രസിന്നെ രക്ഷിക്കാൻ സാധിക്കില്ല. സങ്കടം പറയാൻ പോലും ആളില്ലാത്ത സ്ഥിതിയാണ് കോൺഗ്രസിനുള്ളതെന്നും അവർ പറഞ്ഞു.

കണ്ണൂര്‍ പാര്‍ലമെന്റ് മണ്ഡലം എന്‍ ഡി. എ തെരഞ്ഞെടുപ്പ് കമ്മറ്റി ഓഫീസ് ഉദ്ഘൊടനം ചെയ്യുകയായിരുന്നു പത്മജ വേണുഗോപാൽ. കൂടെ നിൽക്കുന്നവരെ പറ്റിക്കുന്ന സ്വഭാവമാണ് കോൺഗ്രസ് നേതാക്കൾക്കുള്ളത്. കെ.മുരളിധരനുള്ള പരവതാനി കൂടി ഞാൻ വിരിച്ചിട്ടുണ്ട്. ലീഗ് പറയുന്നത് കേള്‍ക്കുന്ന ഏറാന്‍മൂളികളായി കോണ്‍ഗ്രസ് മാറി. കെ മുരളീധരനെ കോണ്‍ഗ്രസ് കുളിപ്പിച്ച് കിടത്തും. ബുദ്ധി വരാന്‍ സമയം എടുക്കും. ഇനിയും മുഖ്യമന്ത്രിമാരുടെ മക്കള്‍ ബിജെപിയിലേക്ക് വരുമെന്നും പത്മജ പറഞ്ഞു.

നാടിന്റെ വികസന പ്രവർത്തനങ്ങളിൽ കെ.കരുണാകരനും മോദിയിലും ചില സാമ്യതയുണ്ട്. കെ.കരുണാകരന്റെ അവകാശവാദവുമായി ആരും മുന്നോട്ട് വരേണ്ട. അമ്മ മരിച്ചതിന് ശേഷം 17 വര്‍ഷം അച്ഛനെ നോക്കിയ തനിക്ക് തന്നെയാണ് കരുണാകരന്റെ അവകാശമെന്നും പത്മജ പ്രതികരിച്ചു. തൃശ്ശൂരിൽ ഇത്തവണ ബിജെപി അക്കൗണ്ട് തുറക്കുമെന്നും അവർ കൂട്ടിച്ചേർത്തു.

സംസ്ഥാന സെക്രട്ടറി കെ. ശ്രീകാന്ത് അധ്യക്ഷനായി. ജില്ലാ പ്രസിഡൻ്റ് എൻ. ഹരിദാസ്, കണ്ണൂർ പാർലമെൻറ് മണ്ഡലം എൻ.ഡി.എ. സ്ഥാനാർത്ഥി സി.രഘുനാഥ്, കെ.രഞ്ജിത്ത്, കെ.കെ. വിനോദ് കുമാർ, ദേശീയ കൗൺസിൽ അംഗം പി.കെ. വേലായുധൻ ബി.ഡി.ജെ. എസ് നേതാക്കളായ ശ്രീധരൻ കാരാട്ട്, കെ.കെ. സോമൻ, ജില്ലാ ജനറൽ സെക്രട്ടറിമാരായ ബിജു, ഏളക്കുഴി എം. ആർ. സുരേഷ് എന്നിവർ സംബന്ധിച്ചു.