ഖലിസ്ഥാന് നേതാവും കനേഡിയന് പൗരനുമായ ഹര്ദീപ് സിങ് നിജ്ജാറിന്റെ കൊലപാതകം കേന്ദ്രീകരിച്ചുള്ള സിബിസി റിപ്പോര്ട്ടിന് ഇന്ത്യയില് യൂട്യൂബ് വിലക്കേര്പ്പെടുത്തി.
വെബ്സൈറ്റിലെ സ്റ്റോറിയില്നിന്ന് വീഡിയോയിലേക്കുള്ള ആക്സസ് തടയാന് കേന്ദ്ര ഐടി മന്ത്രാലയത്തില്നിന്ന് നിര്ദേശം ലഭിച്ചതായി യൂട്യൂബ് അറിയിച്ചെന്നാണ് സിബിസി പറയുന്നത്. ഇതിനുപിന്നാലെയാണ് വിഡിയോ ഇന്ത്യയില് ബ്ലോക്ക് ചെയ്യപ്പെട്ടത്. യുട്യൂബിന് പുറമെ എക്സിനും സമാന നിര്ദേശം കേന്ദ്ര സര്ക്കാര് നല്കിയിട്ടുണ്ടെന്നും സിബിസി അറിയിച്ചു. കാനഡ സര്ക്കാരിന്റെ ധനസഹായത്തോടെ പ്രവര്ത്തിക്കുന്ന സ്ഥാപനമാണ് സിബിസി.
കഴിഞ്ഞവര്ഷം ജൂണ് 18ന് ബ്രിട്ടീഷ് കൊളംബിയയിലെ സറെയിലായിരുന്നു നിജ്ജാര് കൊല്ലപ്പെട്ടത്. ഇതുസംബന്ധിച്ച് ഫിഫ്ത്ത് എസ്റ്റേറ്റ് എന്ന പ്രോഗ്രാമിന്റെ ഭാഗമായായിരുന്നു റിപ്പോര്ട്ട് പ്രസിദ്ധീകരിച്ചത്. സിഖ് ഫോര് ജസ്റ്റിസ് ജനറല് കൗണ്സല് ഗുര്പത്വന്ത് സിങ് പന്നൂവുമായുള്ള അഭിമുഖവും റിപ്പോര്ട്ടില് ഉള്പ്പെടുത്തിയിരുന്നു.
പ്രോഗ്രാമിനെതിരെ ഇന്ഡോകനേഡിയന് സമൂഹത്തില്നിന്ന് വിമര്ശനമുയര്ന്നിട്ടുണ്ട്. സറെ ആസ്ഥാനമായുള്ള റേഡിയോ ഇന്ത്യയുടെ എം ഡിയായ മനിന്ദര് സിങ് ഗില് സിബിസി പ്രസിഡന്റ് കാതറിന് ടയ്റ്റിന് കത്തയച്ചാണ് വിയോജിപ്പ് അറിയിച്ചത്. പ്രോഗ്രാം പക്ഷാപാതപരമാണെന്നാണ് മനിന്ദറുടെ ആരോപണം.
എന്നാല് കേന്ദ്രത്തിന്റെ നടപടിയോട് വിയോജിക്കുന്നതായും അഭിപ്രായ സ്വാതന്ത്ര്യം ഈ പോസ്റ്റുകള്ക്കും ബാധകമാക്കണമെന്നും സിബിസി ആവശ്യപ്പെട്ടു. നടപടി സംബന്ധിച്ച് ഇന്ത്യയിലെ ഔദ്യോഗിക വിഭാഗവുമായി ആശയവിനിമയം നടത്തുണ്ടെന്നും സിബിസി കൂട്ടിച്ചേര്ത്തു.
