ന്യൂദല്ഹി: പേ ടിഎം പേമെന്റസ് ബാങ്കുമായി ബന്ധിപ്പിച്ചിട്ടുള്ള ഫാസ്ടാഗ് ഐഡികള് മറ്റ് ബാങ്കുകളിലേക്ക് മാറ്റണമെന്ന മുന്നറിയിപ്പുമായി ദേശീയപാത അതോറിറ്റി (എന്എച്ച്എഐ). ഫാസ്ടാഗുകള്ക്കായുള്ള അംഗീകൃത ബാങ്കുകളുടെ പട്ടികയില് നിന്ന് പേ ടിഎം പേമെന്റ്സ് ബാങ്കിനെ നീക്കം ചെയ്തതിന് പിന്നാലെയാണ് മുന്നറിയിപ്പുമായി എന്എച്ച്എഐ രംഗത്തെത്തിയത്.
ഫാസ്ടാഗുകള് നല്കാനാകുന്ന അംഗീകൃത ബാങ്കുകളുടെയും നോണ്-ബാങ്കിങ് ഫിനാന്ഷ്യല് കമ്പനികളുടെയും (എന്ബിഎഫ്സി) പട്ടിക എന്എച്ച്എഐ പുതുക്കിയിട്ടുï്. ഫാസ്ടാഗുകള് നല്കുന്നത് ഉള്പ്പെടെയുള്ള പ്രവര്ത്തനങ്ങളില് നിന്ന് പേ ടിഎം പേമെന്റ്സ് ബാങ്ക് ലിമിറ്റഡിനെ ആര്ബിഐ വിലക്കിയതിനെ തുടര്ന്നാണ് നടപടി. മാര്ച്ച് 15 മുതല് പേടിഎം ഫാസ്ടാഗുകള് പ്രവര്ത്തനരഹിതമാകും. ഇതിന് മുന്നോടിയായി മറ്റൊരു ബാങ്കുമായി ഫാസ്ടാഗ് ഐഡി ബന്ധിപ്പിക്കാനാണ് നിര്ദേശം.
15ന് ശേഷം പേ ടിഎം ഫാസ്ടാഗുകള് ടോള്പ്ലാസകളില് പ്രവര്ത്തിക്കില്ല. ഇത് ഇരട്ടി ചാര്ജ് ഈടാക്കുന്നതിനിടയാകുമെന്നും എന്എച്ച്എഐ അറിയിച്ചു. ഏത് ബാങ്കുമായാണോ ഫാസ്ടാഗ് ബന്ധിപ്പിക്കാന് ആഗ്രഹിക്കുന്നത് ഉപയോക്താക്കള് അവരുമായി ബന്ധപ്പെടണം. അല്ലെങ്കില് ഇന്ത്യന് ഹൈവേ മാനേജ്മെന്റ് കമ്പനി ലിമിറ്റഡിന്റെ (ഐഎച്ച്എംസിഎല്) വെബ്സൈറ്റ് സന്ദര്ശിക്കാനും എന്എച്ച്എഐ നിര്ദേശം നല്കി.
ഫാസ്ടാഗ് നല്കാന് കഴിയുന്ന 39 ബാങ്കുകളും എന്ബിഎഫ്സികളും അടങ്ങിയ പട്ടികയാണ് എന്എച്ച്എഐ കഴിഞ്ഞ ദിവസം പുറത്തുവിട്ടത്. എയര്ടെല് പേമെന്റ് ബാങ്ക്, ആക്സിസ് ബാങ്ക് ലിമിറ്റഡ്, ബന്ധന് ബാങ്ക്, ബാങ്ക് ഓഫ് ബറോഡ, കാനറ ബാങ്ക്, എച്ച്ഡിഎഫ്സി, ഐസിഐസിഐ, ഐഡിഎഫ്സി ഫസ്റ്റ് ബാങ്ക്, ഇന്ഡസ് ഇന്ഡ് ബാങ്ക്, കൊട്ടക് മഹീന്ദ്ര ബാങ്ക്, പഞ്ചാബ് നാഷണല് ബാങ്ക്, എസ്ബിഐ, യെസ് ബാങ്ക്, തൃശ്ശൂര് ജില്ലാ സഹ. ബാങ്ക്, അലഹബാദ് ബാങ്ക്, എയു സ്മോള് ഫിനാന്സ് ബാങ്ക്, ബാങ്ക് ഓഫ് മഹാരാഷ്ട്ര, സെന്ട്രല് ബാങ്ക് ഓഫ് ഇന്ത്യ, സിറ്റി യൂണിയന് ബാങ്ക് ലിമിറ്റഡ്, ഫെഡറല് ബാങ്ക്, ഇന്ത്യന് ബാങ്ക്, ഇന്ത്യന് ഓവര്സീസ് ബാങ്ക്, ജെ&കെ ബാങ്ക്, കര്ണാടക ബാങ്ക്, കരൂര് വൈശ്യ ബാങ്ക്, സരസ്വത് ബാങ്ക്, സൗത്ത് ഇന്ത്യന് ബാങ്ക്, സിന്ഡിക്കേറ്റ് ബാങ്ക്, യൂക്കോ ബാങ്ക് എന്നിവയാണ് പട്ടികയിലുള്ളത്.
പ്രതികരിക്കാൻ ഇവിടെ എഴുതുക: