നാവിൽ കൊതിയുണർത്താനായി ദുബായ് ഫുഡ് ഫെസ്റ്റിവൽ എത്തുന്നു ; ഗൾഫ് രുചിക്കൂട്ടുകൾ അടുത്തറിയാൻ ഇത് സുവർണാവസരം

ദുബായ് : ദുബായ് ഫുഡ് ഫെസ്റ്റിവലിന്റെ പതിനൊന്നാമത് പതിപ്പ് ഏപ്രിൽ 19, വെള്ളിയാഴ്ച മുതൽ ആരംഭിക്കും. ദുബായ് മീഡിയ ഓഫീസ് ആണ് ഇക്കാര്യം അറിയിച്ചത്.

ഇരുനൂറിലധികം രാജ്യങ്ങളിൽ നിന്നുള്ളവർ അധിവസിക്കുന്ന ദുബായ് എന്ന നഗരത്തിന്റെ സമ്പുഷ്‌ടമായ രുചിവൈവിധ്യങ്ങൾ അടുത്തറിയാൻ ഈ ഭക്ഷണമേള സന്ദർശകർക്ക് അവസരമൊരുക്കുന്നു.

ദുബായിൽ വാർഷികാടിസ്ഥാനത്തിൽ സംഘടിപ്പിക്കുന്ന ഈ ഭക്ഷണമേളയുടെ പതിനൊന്നാമത് പതിപ്പ് ഏപ്രിൽ 19 മുതൽ മെയ് 12 വരെ ഭക്ഷണപ്രേമികൾക്കായി വിരുന്ന് ഒരുക്കുന്നതാണ്. എമിറേറ്റിലെ ഏറ്റവും മികച്ച രുചിയനുഭവങ്ങളുടെ ഒത്ത് ചേരലാണ് ദുബായ് ഫുഡ് ഫെസ്റ്റിവൽ.

ഇതിന്റെ ഭാഗമായി എമിറേറ്റിലുടനീളം വിവിധ രീതിയിലുള്ള രുചിയനുഭവങ്ങൾ, പരിപാടികൾ എന്നിവ സംഘടിപ്പിക്കുന്നതാണ്. ആഗോള തലത്തിലുള്ള ഭക്ഷ്യവിഭവങ്ങൾക്കൊപ്പം, തനതായ എമിറാത്തി രുചിയനുഭവങ്ങൾ ഉൾപ്പടെ ഈ മേളയിലെത്തുന്ന സന്ദർശകർക്ക് ലഭിക്കുന്നതാണ്.

റെസ്റ്ററന്റുകളും, കഫേകളും ഉൾപ്പടെയുള്ള നൂറുകണക്കിന് ഭക്ഷ്യശാലകളാണ് പതിനൊന്നാമത് ദുബായ് ഫുഡ് ഫെസ്റ്റിവലിൽ പങ്കെടുക്കുന്നത്. പശ്ചിമേഷ്യന്‍ പ്രദേശങ്ങളിൽ വെച്ച് സംഘടിപ്പിക്കുന്ന ഏറ്റവും വലിയ ഭക്ഷ്യമേളയാണിത്.