ഇന്ത്യയിലെ ഏറ്റവും റേറ്റിങ്ങിലുള്ള ടെലിവിഷന്‍ റിയാലിറ്റി ഷോ യാണ് ബിഗ് ബോസ്. ഒരു വര്‍ഷത്തെ കാത്തിരിപ്പിനൊടുവില്‍ വീണ്ടും മലയാളത്തിലേക്ക് ഷോ എത്തിയിരിക്കുകയാണ്. കഴിഞ്ഞ അഞ്ച് സീസണുകളില്‍ നിന്നും വ്യത്യസ്തമായ രീതിയിലാണ് ആറാം സീസണിന് തുടക്കം കുറിച്ചിരിക്കുന്നത്.
സഹമത്സരാര്‍ഥികളെ പ്രകോപിപ്പിച്ചോ വെറുപ്പിച്ചോ തളര്‍ത്തുന്ന രീതിയാണ് ബിഗ് ബോസില്‍ പലരും ചെയ്യാറുള്ളത്. ഈ സീസണിന്റെ തുടക്കത്തില്‍ തന്നെ അങ്ങനൊരു സംഭവത്തിന് തുടക്കമിട്ടിരിക്കുകയാണ്. രതീഷ് കുമാറും സെലിബ്രിറ്റി മേക്കപ്പ് ആര്‍ട്ടിസ്റ്റായ ജാന്‍ മണി ദാസും തമ്മിലാണ് തര്‍ക്കം ഉടലെടുത്തത്.
ഒന്നിനൊന്ന് മികച്ച മത്സരാര്‍ഥികളാണ് ഇത്തവണ വീടിനകത്തേക്ക് പ്രവേശിച്ചിരിക്കുന്നതെന്ന് ആദ്യ ദിവസം തന്നെ വ്യക്തമായി കഴിഞ്ഞിരിക്കുകയാണ്. ഓരോരുത്തരും വാക്കിലും പ്രവൃത്തികളിലൂടെയും ഗെയിം കളിക്കാനാണ് വന്നതെന്ന് തെളിയിച്ച് കഴിഞ്ഞിരിക്കുകയാണ്. ആദ്യ ദിനം കഴിയുന്നതിനൊപ്പം അടുത്ത ദിവസത്തെ പ്രൊമോ കാണിച്ചിരുന്നു. ഇതിലാണ് മത്സരാര്‍ഥികളുടെ ആദ്യ വഴക്ക് ഉള്‍പ്പെടുത്തിയിരിക്കുന്നത്.
ഭക്ഷണം കഴിക്കുന്നതിനിടയിലാണ് സിഗററ്റ് വലിക്കാറുണ്ടെന്ന് ജാന്‍ മണി പറയുന്നത്. ഇത് കേട്ടയുടനെ സിഗററ്റ് വലിക്കുന്നത് ആരോഗ്യത്തിന് ഹാനികരമാണെന്നും അത് നിര്‍ത്തണമെന്നും രതീഷ് ആവശ്യപ്പെടുന്നു. വീണ്ടും ഇതേ കാര്യം ആവര്‍ത്തിച്ചതോടെ പറ്റില്ലെന്നും അത് പറയാന്‍ നിങ്ങളാരാണെന്നും ജാന്‍ മണി തിരികെ ചോദിക്കുന്നു.
ഞാന്‍ പറഞ്ഞതില്‍ തെറ്റൊന്നുമില്ലെന്ന് വീണ്ടും പറഞ്ഞ രതീഷ് തന്റെ നിലപാടില്‍ ഉറച്ച് നിന്നു. തന്നെ ഉപദേശിക്കാന്‍ വരാന്‍ നിങ്ങള്‍ ആരുമല്ലെന്നും എന്റെ ഭര്‍ത്താവാണോ നിങ്ങളെന്നുമൊക്കെ ജാന്‍ മണി തിരികെ ചോദിക്കുന്നുണ്ട്. എന്നാല്‍ തന്റെ അഭിപ്രായം പറയാനാണ് ബിഗ് ബോസിലേക്ക് വന്നതെന്ന ഉറച്ച നിലപാടിലായിരുന്നു രതീഷ്. ഇതോടെ ദേഷ്യത്തിലായ ജാന്‍ മണി എഴുന്നേറ്റ് പോവുകയും ഈ വിഷയത്തെ കുറിച്ച് അപ്‌സരയോട് സംസാരിക്കുകയും ചെയ്യുന്നുണ്ട്.
ഇത്തരം പ്രകോപനങ്ങള്‍ കേള്‍ക്കാതെ പോവുകയാണ് വേണ്ടതെന്നും പ്രശ്‌നങ്ങളെ കേട്ടില്ലെന്ന് നടിക്കാം, അതല്ലെങ്കില്‍ ശക്തമായി അതിനെതിരെ നില്‍ക്കുകയും ചെയ്യാമെന്നൊക്കെ പറഞ്ഞ് അപ്‌സര ജാന്‍ മണിയ്‌ക്ക് ഉപദേശം നല്‍കിയെങ്കിലും കടുത്ത നിലപാടിലായിരുന്നു അവര്‍. എന്തായാലും മത്സരാര്‍ഥികളെ ചൊടിപ്പിച്ച് കണ്ടന്റ് ഉണ്ടാക്കാമെന്ന തീരുമാനത്തിലാണ് രതീഷ് എത്തിയിരിക്കുന്നത്. ജാന്‍ മണി പ്രകോപിതയായോ എന്നന്വേഷിച്ച് കൊണ്ടിരുന്ന രതീഷിനോട് താങ്ങളുടെ ഗെയിം പ്ലാന്‍ ഇതാണോ എന്നും അതിന് വേണ്ടിയല്ലേ നിങ്ങള്‍ ശ്രമിക്കുന്നതെന്നും നടി യമുന ചോദിക്കുന്നുണ്ട്. എന്നാലത് തെറ്റിദ്ധാരണ ആണെന്നും തന്റെ ഉദ്ദേശം അങ്ങനെയൊന്നുമല്ലെന്നും താരം പറയുന്നു.
വരും ദിവസങ്ങളില്‍ കൂടുതല്‍ കണ്ടന്റ് ലഭിക്കാന്‍ സാധ്യത രതീഷില്‍ നിന്നാണെങ്കിലും ഈ തന്ത്രം കൊണ്ട് മുന്നോട്ട് പോവാന്‍ സാധിക്കില്ലെന്നാണ് പ്രേക്ഷകരുടെ അഭിപ്രായം.
പ്രതികരിക്കാൻ ഇവിടെ എഴുതുക: