കോതമംഗലത്ത് മ്ലാവ് ഇടിച്ച് ഓട്ടോറിക്ഷ മറിഞ്ഞു; ഡ്രൈവർക്ക് ദാരുണാന്ത്യം

കൊച്ചി: കോതമംഗലത്ത് കളപ്പാറയിൽ രോഗിയുമായി ആശുപത്രിയിലേക്ക് പോകുകയായിരുന്ന ഓട്ടോറിക്ഷയിൽ മ്ലാവിടിച്ച് അപകടം. സംഭവത്തിൽ ഓട്ടോഡ്രൈവർക്ക് ദാരുണാന്ത്യം. മാമലകണ്ടം സ്വദേശി പിഎൻ വിജിൽ ആണ് മരിച്ചത്. ഓട്ടോയിൽ ഉണ്ടായിരുന്ന മൂന്ന് യാത്രികർ നിസാര പരിക്കുകളോടെ രക്ഷപ്പെട്ടു.

മാമലക്കണ്ടത്ത് നിന്നും കോതമംഗലത്തേക്ക് പോകവെയാണ് സംഭവം. പുന്നേക്കാട്-തട്ടേക്കാട് റോഡിൽ കളപ്പാറ ഭാഗത്ത് വച്ചാണ് അപകടം ഉണ്ടായത്. തിങ്കളാഴ്ച രാത്രി പത്ത് മണിയോടെയായിരുന്നു അപകടം. മ്ലാവ് ഇടിച്ചതിന് പിന്നാലെ ഓട്ടോറിക്ഷ മറിയുകയായിരുന്നു.

ഓട്ടോറിക്ഷയുടെ അടിയിൽ അകപ്പെട്ട വിജിലിനെ ഒപ്പമുണ്ടായിരുന്നവരും വനപാലകരും ചേർന്ന് കോതമംഗലത്തെ ആശുപത്രിയിൽ എത്തിച്ചു. എന്നാൽ പുലർച്ചെ രണ്ട് മണിയോടെ മരണം സംഭവിക്കുകയായിരുന്നു.