കട്ടപ്പന: നഗരത്തില് നടന്ന മോഷണ ശ്രമവുമായി ബന്ധപ്പെട്ട് കഴിഞ്ഞ രണ്ടിന് പോലീസ് കസ്റ്റഡിയിലെടുത്ത പ്രതികള് നടത്തിയ ഇരട്ടകൊലകളില് ഒന്ന് ദുരഭിമാനം ഭയന്നെന്ന് കണ്ടെത്തല്.
നവജാത ശിശുവിനെ കൊലപ്പെടുത്തിയത് ദുരഭിമാനം ഭയന്നെന്നും പ്രതികളിലൊരാളുടെ അച്ഛനായ വിജയനെ കൊന്നത് മുന് വിരോധം മൂലമാണെന്നുമാണ് കണ്ടെത്തല്. 2016ലാണ് ജനിച്ച് നാല് ദിവസം പ്രായമുള്ള കുഞ്ഞിനെ കൊല്ലപ്പെട്ട വിജയനും നിതീഷും ചേര്ന്ന് കൊലപ്പെടുത്തിയത്.
കൊല്ലപ്പെട്ട വിജയനും കുടുംബവും മുന്പ് താമസിച്ചിരുന്ന വീടിനോട് ചേര്ന്നുള്ള പശുതൊഴുത്ത് കുഴിച്ചാണ് പോലീസ് ഇന്നലെ പരിശോധന നടത്തി. വിജയന്റെ മകള്ക്ക് ജനിച്ച കുഞ്ഞിനെ കൊലപ്പെടുത്തി തൊഴുത്തില് കുഴിച്ചു മൂടിയെന്നാണ് പ്രതി നിതീഷ് പോലീസിന് മൊഴി നല്കിയിരിക്കുന്നത്. ഇത് പ്രകാരം ഒന്നര മണിക്കൂറോളം നേരം ഇവിടെ പരിശോധന നടത്തിയെങ്കിലും അവശിഷ്ടങ്ങള് ഒന്നും കണ്ടെത്തിയില്ലെന്ന് ജില്ലാ പോലീസ് മേധാവി പറഞ്ഞു. നിതീഷ് നല്കിയ മൊഴിയില് വൈരുധ്യമുണ്ടെന്നാണ് സൂചന. മൃതദേഹം മറവ് ചെയ്തെന്ന് കരുതുന്ന സ്ഥലത്ത് നിന്നുള്ള മണ്ണ് ഫോറന്സിക് സംഘം ശേഖരിച്ചിട്ടുണ്ട്.
