ആലപ്പുഴ: പ്രതിപക്ഷ നേതാവ് വി ഡി സതീശന് വാര്‍ത്താ സമ്മേളനത്തിന് വൈകി എത്തിയതിലുള്ള നീരസം കെ പി സി സി അധ്യക്ഷന്‍ കെ സുധാകരന്‍ പരസ്യമാക്കിയത് അസഭ്യവാക്ക് ഉച്ചരിച്ച്. മാധ്യമ പ്രവര്‍ത്തകരെ വിളിച്ചു വരുത്തിയിട്ട് പ്രതിപക്ഷ നേതാവ് എവിടെ പോയെന്ന് കെ സുധാകരന്‍ ചോദിച്ചു. സുധാകരന്‍ കൂടുതല്‍ സംസാരിക്കുന്നത് അദ്ദേഹത്തിനൊപ്പമുളള നേതാക്കള്‍ തടയുകയായിരുന്നു.
സുധാകരന്‍ 20 മുനിട്ട് വി ഡി സതീശന് വേണ്ടി കാത്തിരുന്നു.വാര്‍ത്താ സമ്മേളനത്തിന് എത്താന്‍ സതീശന് വൈകിയപ്പോള്‍ ഡി സി സി അധ്യക്ഷന്‍ ബാബു പ്രസാദ് ഫോണില്‍ വിളിച്ച് സുധാകരന്‍ കാത്തിരിക്കുന്ന വിവരം അറിയിച്ചിരുന്നു. എന്നിട്ടും പ്രതിപക്ഷ നേതാവ് വൈകിയതോടെയാണ് സുധാകരന്‍ അനിഷ്ടം പ്രകടിപ്പിച്ചത്. പത്രക്കാരോട് വരാന്‍ പറഞ്ഞിട്ട് കാത്തിരിക്കാന്‍ പറയുന്നത് മോശമല്ലേയെന്ന് സുധാകരന്‍ ചോദിക്കുമ്പോള്‍ മൈക്കും ക്യാമറയും ഓണ്‍ ആണെന്ന് നേതാക്കള്‍ ഓര്‍മ്മിപ്പിച്ചു. തുടര്‍ന്ന് സതീശന് എത്തിയപ്പോഴും മൈക്ക് ഓണാണ് എന്ന് നേതാക്കള്‍ പറയുന്നുണ്ട്.
നേരത്തെ, പുതുപ്പള്ളി തെരഞ്ഞെടുപ്പ് സമയത്ത് സുധാകരനും സതീശനും തമ്മില്‍ സംസാരിക്കാന്‍ മൈക്കിനായി പിടിവലിയായത് ഓര്‍മ്മിപ്പിക്കുന്ന തരത്തിലായിരുന്നു ഇന്നത്തെ അസ്വാരസ്യവും. കെ പി സി സിയുടെ സമരാഗ്‌നിയുമായി ബന്ധപ്പെട്ടുള്ളതായിരുന്നു വാര്‍ത്താ സമ്മേളനം. 10 മണിക്ക് നിശ്ചയിച്ച വാര്‍ത്താ സമ്മേളനത്തിന് 10.30ഓടെയാണ് സുധാകരന്‍ എത്തിയത്.
തുടര്‍ന്ന് 10.50 വരെ പ്രതിപക്ഷ നേതാവ് വരുന്നതിനായി കെപിസിസി പ്രസിഡന്റ് കാത്തിരുന്നു. എന്നിട്ടും സതീശന് എത്താതിരുന്നതോടെയാണ് ഇയാള്‍ എവിടെ പോയി കിടക്കുകയാണ് എന്നും തുടര്‍ന്ന് ഒരു അസഭ്യ വാക്കും സുധാകരന്‍ പറഞ്ഞത്. ഏകദേശം 11 മണിയോടെയാണ് സതീശന് എത്തിയത്.
പ്രതികരിക്കാൻ ഇവിടെ എഴുതുക: