മലപ്പുറം: ബൈക്ക് ഇടിച്ച് തെറിപ്പിച്ച് ഗുരുതര പരിക്കേറ്റ പതിനൊന്നുകാരന് മരിച്ചത് കൃത്യമായ പരിചരണം കിട്ടാതെയെന്ന് കുടുംബം. കോഴിക്കോട് മെഡിക്കല് കോളജില് പ്രവേശിപ്പിച്ച മലപ്പുറം കൊണ്ടോട്ടി മുണ്ടക്കുളം സ്വദേശി മുഹമ്മദ് ഷമാസ് വെള്ളിയാഴ്ചയാണ് മരിച്ചത്. ചികിത്സ പിഴവെന്ന പരാതി കുടുംബം മുഖ്യമന്ത്രിക്കും ആരോഗ്യമന്ത്രിക്കും നല്കി.
വെളളിയാഴ്ച വൈകിട്ട് വീടിന് സമീപമുളള കടയില് പോയി മടങ്ങവെ റോഡ് മുറിച്ച് കടക്കുന്നതിനിടെയാണ് ഷമാസിനെ ബൈക്ക് ഇടിച്ചത്. ഉടന് തന്നെ കൊണ്ടോട്ടിയിലെ സ്വകാര്യ ആശുപത്രിയിലും പിന്നീട് കോഴിക്കോട് മെഡിക്കല് കോളേജിലും പ്രവേശിപ്പിച്ചു.
ആറ് മണിയോടെ മാതൃശിശുകേന്ദ്രത്തിലെത്തിച്ച കുട്ടിയെ ഡോക്ടര് പരിശോധിച്ചത് രണ്ട് മണിക്കൂറിന് ശേഷമാണെന്നാണ് ആരോപണം.വാരിയെല്ലുകള് ഒടിഞ്ഞെന്നും ശ്വാസകോശത്തിന് പരിക്കേറ്റെന്ന് തിരിച്ചറിഞ്ഞതും മണിക്കൂറുകള് കഴിഞ്ഞാണ്. വേദന കൊണ്ട് പിടഞ്ഞപ്പോള് കാലുകള് കെട്ടിയിടാനാണ് നഴ്സുമാര് പറഞ്ഞതെന്നും ആരോപണമുണ്ട്.
