കോഴിക്കോട്: കേരളം ഇപ്പോള്‍ ഭരിക്കുന്നത് ഒരു ഭാഗത്ത് കാട്ടാനയും മറുഭാഗത്ത് വെള്ളാനകളുമാണെന്ന് ബിജെപി ദേശീയ നിര്‍വാഹക സമിതി അംഗം പി.കെ. കൃഷ്ണദാസ്. എന്‍ഡിഎ ചെയര്‍മാന്‍ കെ. സുരേന്ദ്രന്‍ നയിക്കുന്ന കേരള പദയാത്ര കോഴിക്കോട്ട് ഉദ്ഘാടനം ചെയ്യുകയായിരുന്നു അദ്ദേഹം. പിണറായി വിജയന്റെ നേതൃത്വത്തിലുള്ള 21 അംഗ വെള്ളാന മന്ത്രിസഭ കൊണ്ട് കേരളത്തിലെ ജനങ്ങള്‍ ദുരിതത്തിലായിരിക്കുകയാണ്.
ഇവര്‍ ജനങ്ങളെ ഇഞ്ചിഞ്ചായി കൊല്ലുകയാണ്. കുഞ്ഞുങ്ങള്‍ക്കു പോലും സുരക്ഷയില്ലാതായി. മെച്ചപ്പെട്ട വിദ്യാഭ്യാസത്തിനായി വിദ്യാര്‍ത്ഥികള്‍ പുറംനാടുകളെ ആശ്രയിക്കേണ്ട ഗതികേടിലാണ്. ഇതില്‍ നിന്ന് കേരളത്തിന് മോചനം വേണമെങ്കില്‍ ബിജെപിയെ അധികാരത്തിലേറ്റണം. കേരളത്തെ പുനഃസൃഷ്ടിക്കാന്‍ കഴിയുമെന്നതിനുള്ള ഉത്തമ ഉദാഹരണമാണ് മോദി ഗ്യാരന്റി. അധികാരത്തിലേറുമ്പോള്‍ ജനങ്ങള്‍ക്ക് നല്‍കിയ മുഴുവന്‍ വാഗ്ദാനങ്ങളും നടപ്പിലാക്കിയ പ്രധാനമന്ത്രിയാണ് നരേന്ദ്രമോദി എന്ന് അദ്ദേഹം പറഞ്ഞു.
മോദി ഗ്യാരന്റി വികസനത്തില്‍ ഊന്നിക്കൊണ്ടുള്ളതാണ്. അതില്‍ സ്വര്‍ണക്കടത്ത്, ഡോളര്‍ കടത്ത്, മക്കള്‍ മാസപ്പടി, അഴിമതി എന്നിവ ഉണ്ടാവില്ല. ബിജെപി ജില്ലാ പ്രസിഡന്റ് അഡ്വ. വി.കെ. സജീവന്‍ അധ്യക്ഷനായി. സംസ്ഥാന ജനറല്‍ സെക്രട്ടറിമാരായ എം.ടി. രമേശ്, അഡ്വ. പി. സുധീര്‍, സംസ്ഥാന വൈസ് പ്രസിഡന്റുമാരായ വി.വി. രാജന്‍, പി. രഘുനാഥ്, ബിഡിജെഎസ് സംസ്ഥാന സെക്രട്ടറി ബാബു പൂതംപാറ, ദേശീയ കേരള കോണ്‍ഗ്രസ് സംസ്ഥാന ജനറല്‍ സെക്രട്ടറി എം.എന്‍. കരീം, കേരള കാമരാജ് കോണ്‍ഗ്രസ് സംസ്ഥാന അധ്യക്ഷന്‍ വിഷ്ണുപുരം ചന്ദ്രശേഖരന്‍, ശിവസേന സംസ്ഥാന പ്രസിഡന്റ് അഡ്വ. ഹരികുമാര്‍, എല്‍ജെപി ജില്ലാ പ്രസിഡന്റ് കാളകണ്ടി അരുണ്‍കുമാര്‍ സംസാരിച്ചു.
പ്രതികരിക്കാൻ ഇവിടെ എഴുതുക: