യുഎഇ: വലിയ വാഹനങ്ങളുടെ പരമാവധി ഭാരം നിയന്ത്രിക്കുന്നതിനുള്ള തീരുമാനം മാറ്റിവെച്ചു

ദുബായ്: രാജ്യത്തെ വലിയ ചരക്ക് വാഹനങ്ങളുടെ പരമാവധി ഭാരം, വലിപ്പം എന്നിവ ചട്ടം മൂലം നിയന്ത്രിക്കുന്നതിനുള്ള തീരുമാനം യു എ ഇ ക്യാബിനറ്റ് മാറ്റിവെച്ചു. ഫെബ്രുവരി 18-ന് ചേർന്ന ക്യാബിനറ്റ് യോഗത്തിലാണ് ഈ തീരുമാനം.

ഈ തീരുമാനം നീട്ടിവെക്കാൻ യുഎ ഇ ക്യാബിനറ്റ് ബന്ധപ്പെട്ട് വകുപ്പുകളോട് ആവശ്യപ്പെട്ടിട്ടുണ്ട്. ഈ തീരുമാനം സംബന്ധിച്ച സമഗ്രമായ ഒരു പഠനം നടത്താൻ യു എഇ മിനിസ്ട്രി ഓഫ് എനർജി ആൻഡ് ഇൻഫ്രാസ്ട്രക്ചാറിനോട് ക്യാബിനറ്റ് ആവശ്യപ്പെട്ടിട്ടുണ്ട്.

രാജ്യത്തെ വലിയ വാഹനങ്ങളുടെ പരമാവധി ഭാരം, വലിപ്പം എന്നിവ നിയമം മൂലം നിയന്ത്രിക്കുന്നത് സംബന്ധിച്ച് 2023 സെപ്റ്റംബറിലാണ് യുഎഇ ക്യാബിനറ്റ് തീരുമാനിച്ചത്. ഇതുമായി ബന്ധപ്പെട്ട് ‘2023/138’ എന്ന ക്യാബിനറ്റ് തീരുമാന പ്രകാരം ‘2023/12’ എന്ന ഫെഡറൽ ഉത്തരവ് പുറത്തിറക്കിയിരുന്നു.

ഈ തീരുമാനപ്രകാരം 65 ടണിലധികം ഭാരമുള്ള വാഹനങ്ങൾക്ക് യു എ ഇയിലെ റോഡുകളിൽ നിരോധനം ഏർപ്പെടുത്തുമെന്നാണ് ക്യാബിനറ്റ് അറിയിച്ചിരുന്നത്. ഈ തീരുമാനം 2024-ന്റെ ആദ്യ പാദത്തിൽ നടപ്പിലാക്കുമെന്നും അന്ന് ക്യാബിനറ്റ് അറിയിച്ചിരുന്നു.