ന്യൂദല്‍ഹി: എസ്എഫ്ഐഒ അന്വേഷണത്തിനെതിരെ മുഖ്യമന്ത്രിയുടെ മകള്‍ നല്‍കിയ ഹര്‍ജി കര്‍ണാടക ഹൈക്കോടതിയും തള്ളിയതോടെ മുഖ്യമന്ത്രിയും സിപിഎമ്മും നാണംകെട്ടെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍.
ഗുരുതരമായ സാമ്പത്തിക ക്രമക്കേട് നടന്നതുകൊണ്ടാണ് കേരള ഹൈക്കോടതിയ്‌ക്ക് പിന്നാലെ കര്‍ണാടക ഹൈക്കോടതിയും വീണാ വിജയന്റെ ഹര്‍ജി തള്ളിയത്. ഇതോടെ രാഷ്‌ട്രീയപകപോക്കലെന്ന വാദത്തിന്റെ മുനയൊടിഞ്ഞെന്നും കെ. സുരേന്ദ്രന്‍ ദല്‍ഹിയില്‍ പറഞ്ഞു.
അന്വേഷണം അതിന്റെ വഴിക്ക് നടക്കുമെന്നും അതില്‍ ഇടപെടില്ലെന്നുമായിരുന്നു സിപിഎം സംസ്ഥാന സെക്രട്ടറി എം.വി. ഗോവിന്ദന്‍ പറഞ്ഞത്. എന്നാല്‍ കെഎസ്ഐഡിസിയെ ഉപയോഗിച്ച് കേരള ഹൈക്കോടതിയില്‍ അന്വേഷണം തടയാന്‍ ഹര്‍ജി നല്‍കുകയാണ് മുഖ്യമന്ത്രിയും സിപിഎമ്മും ചെയ്തത്. കേരള ഹൈക്കോടതിയില്‍ നിന്നും തിരിച്ചടിയേറ്റത് വളഞ്ഞവഴിയിലൂടെ മറികടക്കാനാണ് വീണാ വിജയന്‍ കര്‍ണാടക ഹൈക്കോടതിയെ സമീപിച്ചത്. കര്‍ണാടക ഹൈക്കോടതിയും അന്വേഷണം തുടരാമെന്ന് ഉത്തരവിട്ടതോടെ മുഖ്യമന്ത്രിക്ക് ഇരട്ടപ്രഹരമേറ്റു. ഇനിയെങ്കിലും പിണറായി വിജയനും മകളും അന്വേഷണത്തോട് സഹകരിക്കണം. മടിയില്‍ കനമുള്ളതുകൊണ്ടാണ് മുഖ്യമന്ത്രി അന്വേഷണത്തെ ഭയക്കുന്നതെന്നും കെ. സുരേന്ദ്രന്‍ കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: