തിരുവനന്തപുരം: മുന് ഡിജിപി സുധേഷ് കുമാറിന്റെ മകള് പൊലീസ് ഡ്രൈവറെ മര്ദ്ദിച്ച കേസില് കുറ്റപത്രം സമര്പ്പിച്ച് ക്രൈംബ്രാഞ്ച്. സംഭവം നടന്ന് അഞ്ചര വര്ഷത്തിന് ശേഷമാണ് കുറ്റപത്രം സമര്പ്പിച്ചത്. പൊലീസ് ഡ്രൈവര് ജാതി പറഞ്ഞ് അധിക്ഷേപിച്ചെന്ന ഡിജിപിയുടെ മകളുടെ പരാതി പൊലീസ് തള്ളി.
മുന് ഡിജിപി സുധേഷ് കുമാറിന്റെ മകള് സ്നിഗ്ധ പൊലീസ് ഡ്രൈവര് ഗവാസ്ക്കറിനെയാണ് മര്ദ്ദിച്ചത്. കനകകുന്നില് പ്രഭാത സവാരിക്ക് എത്തിയപ്പോള് കഴുത്തിന് പിന്നില് മര്ദ്ദിച്ചു എന്നാണ് പരാതി. വീട്ടുകാരില് നിന്നും നേരിട്ട പീഡനങ്ങള് സംബന്ധിച്ച് സുധേഷ് കുമാറിനോട് പരാതിപ്പെട്ടതിന് പ്രതികാരമായിരുന്നു മര്ദ്ദനമെന്നായിരുന്നു പൊലീസ് ഡ്രൈവറുടെ പരാതി. മര്ദ്ദിച്ചതിനും അസഭ്യം പറഞ്ഞതിനും ഡ്യൂട്ടി തടസപ്പെടുത്തിയതിനുമാണ് കേസെടുത്തത്.
ഗവാസ്ക്കര് ആശുപത്രിയില് പ്രവേശിച്ചതിന് പിന്നാലെ ഡ്രൈവര് ജാതിപ്പേര് വിളിച്ച് അധിക്ഷേപിച്ചുവെന്ന പരാതി ഡിജിപിയുടെ മകളും നല്കി. ഈ പരാതിയിലും പൊലീസ് കേസെടുത്തു. രണ്ട് കേസുകളും ക്രൈം ബ്രാഞ്ചിന് സര്ക്കാര് കൈമാറി. സമ്മര്ദ്ദം ചെലുത്തി പരാതി പിന്വലിക്കാന് ശ്രമമുണ്ടായെങ്കിലും വഴങ്ങാതെ കുറ്റപത്രം നല്കണമെന്നാവശ്യപ്പെട്ട് ഗവാസ്ക്കര് ഹൈക്കോടതിയെ സമീപിച്ചു.
രണ്ടു വര്ഷം മുമ്പ് അന്വേഷണം പൂര്ത്തിയാക്കി ക്രൈം ബ്രാഞ്ച് എസ് പി കുറ്റപത്രം ക്രൈം ബ്രാഞ്ച് മേധാവിക്ക് നല്കി. ഈ റിപ്പോര്ട്ട് നിയമോപദേശത്തിന് അയച്ചു. ഡ്യൂട്ടി തടസപ്പെടുത്തിയതിനും അസഭ്യം പറഞ്ഞതിനുമുള്ള വകുപ്പുകള് നിലനില്ക്കില്ലെന്ന് നിയമോപദേശം ലഭിച്ചു.
ഡിജിപിയുടെ കുടുംബത്തോടൊപ്പം സ്വകാര്യ യാത്രക്ക് പോയതിനാല് ഡ്യൂട്ടി തടസപ്പെടുത്തിതായി കണക്കാക്കാനാവില്ലെന്നായിരുന്നു നിയമോപദേശം.കൈകൊണ്ട് മര്ദ്ദിച്ചതിന് മൂന്നു വര്ഷം വരെ ശിക്ഷ ലഭിക്കാവുന്ന വകുപ്പു ചുമത്താന് കോടതിയുടെ മുന് കൂര് അനുമതി വാങ്ങേണ്ടതിനാല് അതിന് തുനിയാതെ ഉന്നത ഉദ്യോഗസ്ഥര് ഇടപെട്ട് റിപ്പോര്ട്ട് വൈകിപ്പിച്ചു. ഹൈക്കോടതി വീണ്ടും ഇടപ്പെട്ടതോടെയാണ് അനുതി വാങ്ങി ഒടുവില് കുറ്റപത്രം കോടതിയില് നല്കിയത്. വിജിലന്സ് മേധാവിയായിരുന്ന സുധേഷ് കുമാര് ഒരു വര്ഷം മുമ്പ് വിരമിച്ചു.
