തിരുവനന്തപുരം: മാതൃഭൂമി സംഘടിപ്പിച്ച അന്താരാഷ്‌ട്ര അക്ഷരോത്സവ വേദിയില്‍ സംസ്‌കൃതഭാഷയെ വൃത്തികെട്ടതെന്ന് വിശേഷിപ്പിച്ചതിലൂടെ എഴുത്തുകാരന്‍ ജയമോഹന്റെ അജ്ഞതയാണ് പുറത്തുവന്നിരിക്കുന്നതെന്ന് എന്‍ടിയു.
വാല്മീകിയും വ്യാസനും ഭാസനും മാഘനും കാളിദാസനും തുടങ്ങി എണ്ണമറ്റ മഹാകവികള്‍ അവരുടെ വിശ്വോത്തരങ്ങളായ മഹാകാവ്യങ്ങള്‍ രചിച്ചിട്ടുള്ളത് ശ്രേഷ്ഠഭാഷയായ സംസ്‌കൃതത്തിലാണ്. അങ്ങനെയുള്ള സംസ്‌കൃതത്തെ, അക്ഷരോപാസകനായ ഒരു കവിക്ക് എങ്ങനെ വൃത്തികെട്ടത് എന്ന് വിശേഷിപ്പിക്കാനാകും. ലോകത്ത് നിരവധി ഭാഷകളില്‍ അസംഖ്യം കവികളുടെ രചനയ്‌ക്ക് വിഷയീഭവിച്ച ഇതിഹാസകാവ്യങ്ങള്‍ വിരചിതമായതും സംസ്‌കൃതത്തിലാണ്. അത്തരം കാല, ദേശ ഭാഷാതിവര്‍ത്തികളായ രചനകളെപ്പറ്റിയുള്ള അജ്ഞതയാണ് ജയമോഹനെക്കൊണ്ട് ഇങ്ങനെ പറയിച്ചത്.
വൃത്തികെട്ടതിനെ സംസ്‌കൃതമെന്ന് പറയില്ലെന്നും സംസ്‌കരിച്ചെടുത്തതാണ് സംസ്‌കൃതമെന്നുമുള്ള സാമാന്യ വിവരം പോലും ‘കവി’ക്കില്ലെന്ന് വേണം കരുതാന്‍. സാഹിത്യലോകത്ത് വേണ്ടത്ര ശ്രദ്ധിക്കപ്പെടാത്ത തന്നെ സ്വയം ഉയര്‍ത്തിക്കൊണ്ടുവരാനുള്ള വിടുവായത്തം വിളമ്പലായിട്ട് മാത്രമേ ഇതിനെ കാണാനാകൂ.
സ്ത്രീകളായ എഴുത്തുകാര്‍ രചനാ മികവ് കൊണ്ടല്ല ആദരിക്കപ്പെടുന്നതെന്നും മറിച്ച് ഗിമ്മിക്കുകള്‍ കാണിച്ച് മാധ്യമശ്രദ്ധയും ജനപ്രീതിയും നേടുകയാണെന്നുമുള്ള വിവാദ പരാമര്‍ശം നടത്തുകയും പിന്നീട് അതില്‍നിന്ന് തലയൂരുകയും ചെയ്തയാളാണ് ജയമോഹന്‍. ഇപ്പോഴത്തെ പരാമര്‍ശത്തിലൂടെ, സ്ത്രീകള്‍ക്കെതിരായ തന്റെ പഴയ നിരീക്ഷണം അദ്ദേഹത്തിന് തന്നെയാണ് യോജിക്കുക എന്ന് തെളിയിച്ചിരിക്കുകയാണെന്ന് എന്‍ടിയു സംസ്ഥാന പ്രസിഡന്റ് പി.എസ്. ഗോപകുമാര്‍ പറഞ്ഞു.
പ്രതികരിക്കാൻ ഇവിടെ എഴുതുക: