കൊച്ചി: കൊലപാതകത്തേക്കാളും അപകടകരമായി കാണുന്നത് മനുഷ്യന്റെ ലൈംഗികതയാണെന്നും ആനന്ദങ്ങളെ നിഷേധിക്കുന്നത് ഫാസിസ്റ്റ് മനോഭാവമാണെന്നും അഞ്ചാമത് വനിതാ രാജ്യാന്തര ചലച്ചിത്ര മേളയില് ‘സിനിമയിലെ സ്ത്രീ ലൈംഗികതയുടെ പ്രതിനിധാനം’ എന്ന വിഷയത്തില് നടന്ന ചര്ച്ചയില് നടിയും സാമൂഹിക പ്രവര്ത്തകയും കേരള സംസ്ഥാന ടെലിവിഷന് അവാര്ഡ് ജേതാവുമായ ജോളി ചിറയത്ത് പറഞ്ഞു.
ഇന്ന് ‘അവളുടെ രാവുകള്’ പോലുള്ള സിനിമകള് ഉണ്ടാകുമോയെന്നും ജോളി ചിറയത്ത് അഭിപ്രായപ്പെട്ടു. ചര്ച്ചയില് ഗവേഷകയും അധ്യാപികയുമായ ഇന്ദു രമാ വാസുദേവ്, അധ്യാപികയും സംവിധായകയുമായ ആശാ അച്ചി ജോസഫ്, 15 ാമത് അന്താരാഷ്ട്ര ഡോക്യുമെന്ററി ചലച്ചിത്രമേളയിലെ ജേതാക്കളായ ലൂര്ദ്സ് എം. സുപ്രിയ, ഗുര്ലീന് ഗ്രേവല് എന്നിവര് പങ്കെടുത്തു. നിറം ലൈംഗികതയെ സ്വാധീനിക്കുന്നുവെന്നും വെളുത്ത സ്ത്രീകളുടെ ലൈംഗികതയാണ് സിനിമ സംസാരിക്കുന്നതെന്നും ഇന്ദു രമ വാസുദേവ് പറഞ്ഞു. സ്ത്രീയെ സൗഹൃദപരമായി കാണുന്ന പുരുഷ സംവിധായകരാണ് കുറച്ചുകൂടി ക്രിട്ടിക്കല് ആയി സ്ത്രീ കഥാപാത്രങ്ങളെ എടുത്തിട്ടുള്ളത്. യാഥാര്ത്ഥ്യങ്ങളെ പറ്റി കൂടുതലായി നമ്മള് സംസാരിച്ച് തുടങ്ങണം. നിറത്തിന്റെ ലൈംഗികത കൂടെ നമ്മള് ചര്ച്ച ചെയ്യേണ്ടതുണ്ട്. ഏതെങ്കിലും നിലയ്ക്ക് സ്വാതന്ത്ര്യം അനുഭവിക്കുന്ന സ്ത്രീകള്ക്ക് മാത്രമേ ആനന്ദങ്ങളിലേക്ക് ഇറങ്ങിവരാന് സാധിക്കുന്നുള്ളൂ. വേലക്കാരിയുടെ ആനന്ദത്തെ വളരെ പുച്ഛിച്ചാണ് സമൂഹം കാണുന്നതെന്നും അവര് അഭിപ്രായപ്പെട്ടു. കേരളം ഹ്യൂമന് ഡെവലപ്മെന്റ് ഇന്ഡക്സില് വളരെ മുന്നില് ആണെങ്കിലും സ്ത്രീകള് പല കാര്യങ്ങളിലും പിന്നിലാകുന്നുണ്ട് എന്ന് ആശാ അച്ചി ജോസഫ് പറഞ്ഞു. ഭാരതത്തില് പേട്രിയാര്ക്കിയെ കൂടുതലും മുറുകെ പിടിക്കുന്നത് കേരളത്തിലെ സ്ത്രീകളാണെന്നും കേരളത്തില് കാര്യമായി സ്ത്രീകള് സിനിമയിലേക്ക് വരുന്നുണ്ടെങ്കിലും ചര്ച്ച ചെയ്യപ്പെടുന്നുണ്ടെങ്കിലും സ്ക്രീനില് അധികമായി കാണാന് കഴിയുന്നില്ലെന്നും അവര് അഭിപ്രായപ്പെട്ടു. ഹോമോഫോബിയക്കെതിരെ കാതല് എന്ന സിനിമ സംസാരിക്കുന്നുണ്ടെങ്കിലും ജ്യോതികയുടെ കഥാപാത്രത്തെ പ്രതികരണശേഷിയില്ലാത്ത ഒന്നായി മാത്രമേ സിനിമയില് കാണാന് കഴിഞ്ഞുള്ളൂവെന്ന് ലൂര്ദ്സ് എം. സുപ്രിയ അഭിപ്രായപ്പെട്ടു. ലൈംഗികതയെ പലപ്പോഴും വയലന്സ് ടൂള് ആയിട്ട് ആണ് ഉപയോഗിക്കുന്നത് എന്ന് ഗൂര്ലീന് ഗ്രേവല് പറഞ്ഞു.
കേരളത്തിന്റെ സിനിമാ ചരിത്രത്തിലെ സുപ്രധാന വ്യക്തിത്വമായ പി.കെ. റോസിയെ ഓര്ക്കേണ്ടതുണ്ട് എന്നും സിനിമ മേഖലയിലേക്ക് ഇനിയും സ്ത്രീകള് വരാന് എന്താണ് ചെയ്യേണ്ടതെന്ന് ചിന്തിക്കണമെന്നും ചര്ച്ചയില് പങ്കെടുത്ത തമിഴ് എഴുത്തുകാരിയായ ഹേമ അഭിപ്രായപ്പെട്ടു. കേരളത്തില് ഇന്നും ലെസ്ബിയന് ദമ്പതിമാരെ അംഗീകരിക്കാന് സമൂഹത്തിന് കഴിയുന്നില്ല എന്ന് ശീതല് ശ്യാം അഭിപ്രായപ്പെട്ടു.
