സാന്റിയാഗോ: അപകടകരമാം വിധം കാട്ടുതീ പടര്‍ന്നതോടെ ചിലിയില്‍ അടിയന്തരാവസ്ഥ പ്രഖ്യാപിച്ചു. അന്‍പതിലേറെപ്പേര്‍ മരിച്ചതായി ചിലി പ്രസിഡന്റ് ഗബ്രിയേല്‍ ബോറിക് അറിയിച്ചു. ഗുരുതരമായി പൊള്ളലേറ്റ് നിരവധി പേരെ ആശുപത്രികളില്‍ പ്രവേശിപ്പിച്ചിട്ടുണ്ട്. മരണസംഖ്യ ഇനിയും ഉയര്‍ന്നേക്കാമെന്നും അദ്ദേഹം കൂട്ടിച്ചേര്‍ത്തു.
രാജ്യത്തെ എല്ലാ സേനകളെയും ദുരന്തമുഖത്ത് വിന്യസിച്ചിട്ടുണ്ട്. സ്ഥിതി നിയന്ത്രണ വിധേയമാക്കുന്നതിനുള്ള എല്ലാ മര്‍ഗങ്ങളും സ്വീകരിച്ചിട്ടുണ്ട്. രക്ഷാപ്രവര്‍ത്തകരുമായി സഹകരിക്കണമെന്നും അദ്ദേഹം എക്‌സില്‍ കുറിച്ചു.
ചിലിയിലെ വിന ഡെല്‍മാറിലെ ജനവാസ മേഖലയിലാണ് കാട്ടുതീ പടര്‍ന്നു പിടിക്കുന്നത്. 200ലേറെ പേരെ കാണാതായി. 1,100 പേര്‍ക്ക് വീട് നഷ്ടമായതായും കണക്കുകള്‍ സൂചിപ്പിക്കുന്നു. 43,000 ഹെക്ടറിലധികം സ്ഥലത്ത് തീപ്പിടിച്ചെന്നാണ് ആഭ്യന്തര മന്ത്രാലയത്തിന്റെ റിപ്പോര്‍ട്ട്. ഉയര്‍ന്ന താപനിലയും ശക്തമായകാറ്റുമാണ് തീപടരാന്‍ കാരണമെന്നാണ് പ്രാഥമിക വിവരം. കാട്ടുതീ പടര്‍ന്ന പ്രദേശങ്ങളില്‍ മണിക്കൂറില്‍ 40-50 കിലോമീറ്റര്‍ വേഗത്തിലാണ് കാറ്റ് വീശുന്നത്. ഇത് രക്ഷാപ്രവര്‍ത്തനത്തിനും വെല്ലുവിളിയാവുകയാണ്.
രക്ഷാപ്രവര്‍ത്തകരുള്‍പ്പെടെ മരിച്ചുവെന്നും റിപ്പോര്‍ട്ടുണ്ട്. രക്ഷാപ്രവര്‍ത്തനത്തിനെത്തിയ ഹെലിക്കോപ്ടര്‍ തകര്‍ന്നുവീണ് പൈലറ്റും മെക്കാനിക്കും കൊല്ലപ്പെട്ടു. ചിലിയില്‍ 151 ഇടങ്ങളില്‍ കാട്ടുതീ റിപ്പോര്‍ട്ട് ചെയ്തിട്ടുണ്ട്. വീടുകളിലേക്ക് രക്ഷാപ്രവര്‍ത്തകര്‍ക്ക് എത്തിപ്പെടാന്‍ സാധിക്കാത്തത് വലിയ പ്രതിസന്ധിയാണ് സൃഷ്ടിച്ചിരിക്കുന്നത്.
പ്രതികരിക്കാൻ ഇവിടെ എഴുതുക: