ന്യൂയോര്ക്ക്: രജതജൂബിലി വര്ഷത്തില് വ്യത്യസ്ഥവും പുതുമയാര്ന്നതുമായ നിരവധി പരിപാടികള് കേരള ഹിന്ദൂസ് ഓഫ് നോര്ത്ത അമേരിക്ക (കെ എച്ച് എന് എ) നടപ്പിലാക്കുമെന്ന് പ്രഡിഡന്റ് ഡോ നിഷ പിള്ള അറിയിച്ചു. അമേരിക്കയില് ജീവിക്കുന്ന അംഗങ്ങളുടെ നിത്യജീവിതത്തിന്റെ ഭാഗമായ കാര്യങ്ങളിലേക്ക് കൂടുതല് വെളിച്ചം വീശുന്ന പരിപാടികളും പുതുതലമുറയെ സാംസ്കാരികമായി ഉയര്ത്താനുമുതകുന്ന പരിപാടികളും വേണം എന്ന വിലയിരുത്തലിന്റെ അടിസ്ഥാനത്തിലാണിത്.
ഫെബ്രുവരി 4ന് ഉദ്ഘാടനം ചെയ്യുന്ന കുട്ടികള്ക്കായുള്ള ‘ലോലി പോപ്’ പരിപാടി ഇത്തരത്തിലൊന്നാണ്. കുട്ടികളും മാതാപിതാക്കളും മുത്തശീമുത്തശ്ശന്മാരും അടങ്ങുന്ന പരിപാടിയാണ് ഇത്. കുട്ടികള്ക്കായി കഥയും കവിതയും മന്ത്രങ്ങളും വഴി പുരാണേതിഹാസങ്ങള് പരിചയയപ്പെടുത്തിക്കൊടുക്കുന്ന ലോലി പോപ്പ്. പരിപാടിയില് പങ്കെടുക്കാന് നൂറ്റിമുപ്പതോളം കുട്ടികള് രജിസ്റ്റര് ചെയ്തുകഴിഞ്ഞു.
കെ എച്ച് എന് എ ഓഡിറ്റ് ഫോറത്തിന്റെ നേതൃത്വത്തില് ടാക്സ് അപ്ഡേറ്റ് ആന്ഡ് ടാക്സ് പ്ലാനിങ് എന്ന പരിപാടി നടക്കും. ശനിയാഴ്ച നടക്കുന്ന പരിപാടിക്ക് അശോക് മേനോന് സി പി എ, ബാബു ഉത്തമന് സി പി എ എന്നിവര് നേതൃത്വം നല്കും.
അമേരിക്കയിലെ പ്രവാസി ഹിന്ദുക്കളുടെ വരുംതലമുറയ്ക്ക് ആത്മീയവഴിയിലൂടെ മുന്നേറാന് പാകത്തിന് വിവിധങ്ങളായ പരിപാടികളും ആവിഷ്കരിച്ചിട്ടുണ്ട്. പാര്ത്ഥസാരഥി പിള്ള കോര്ഡിനേറ്ററായി സ്പിരിച്വല് ഫോറം രൂപീകരിച്ചിട്ടുണ്ട്. എല്ലാ വാരാന്ത്യങ്ങളിലും അംഗങ്ങള്ക്കായി ആത്മീയ പ്രഭാഷണങ്ങള് സംഘടിപ്പിക്കുകയാണ് ലക്ഷ്യം. ആദ്യപരിപാടിയെന്നവണ്ണം ഡോ പദ്മജ പ്രേം നടത്തിയ പ്രഭാഷണം വന് വിജയമായതായി ഡോ.നിഷാ പിള്ള പറഞ്ഞു.
കെഎച്ച്എന്എ യുടെ പ്രസിദ്ധീകരണമായ അഞ്ജലിയും സുവനീറും പുറത്തിറക്കാന് അനഘ ഹരീഷിന്റെ നേതൃത്വത്തില് സമിതി പ്രവര്ത്തനം തുടങ്ങി. കാനഡയില്നിന്നുള്ള ഡോ എ പി സുകുമാറിന്റെ നേതൃത്വത്തില് ലിറ്റററി ഫോറം സജീവമായി പ്രവര്ത്തിക്കാനാരംഭിച്ചതായും ഡോ.നിഷാ പിള്ള പറഞ്ഞു.
കെച്ച് എന് എ വിരാട് 25 എന്നു പേരിട്ടിരിക്കുന്ന ജൂബിലി കണ്വന്ഷന് 2025 ജൂലൈയില് ന്യൂയോര്ക്കിലാണ് നടക്കുക.
ജന്മഭൂമി ഓണ്ലൈന്