ആലപ്പുഴ: കടപ്പുറം വനിതാ ശിശു ആശുപത്രിയില്‍ ലാപ്രാസ്‌കോപിക്ക് ശസ്ത്രക്രിയയെ തുടര്‍ന്ന് യുവതി മരിച്ച സംഭവത്തില്‍ ജില്ലാ ലീഗല്‍ സര്‍വീസസ് അതോറിറ്റി അന്വേഷണം ആരംഭിച്ചു.
ആലപ്പുഴ പഴവീട് ശരത്ത് ഭവനില്‍ ആശാ ശരത്ത്(31) മരണമടഞ്ഞ സംഭവത്തിലാണ് ലീഗല്‍ സര്‍വീസസ് അന്വേഷണത്തിന് തുടക്കമിട്ടത്. ഇതിന്റെ ഭാഗമായി ലീഗല്‍ സര്‍വീസസ് അതോറിറ്റി സബ് ജഡ്ജ് പ്രമോദ് മുരളിയുടെ നിര്‍ദേശപ്രകാരം ജില്ലാ പ്രോഗ്രാം കോ ഓര്‍ഡിനേറ്റര്‍ ബി.ബിന്ദു ഭായി, ആശാ ശരത്തിന്റെ വീട്ടിലെത്തി ഭര്‍ത്താവ് ശരത്, മറ്റ് ബന്ധുക്കള്‍ എന്നിവരില്‍ നിന്ന് വിവരങ്ങള്‍ തേടി.
ആലപ്പുഴ കടപ്പുറം വനിതാ ശിശു ആശുപത്രിയില്‍ ശസ്ത്രക്രിയക്കിടെ നടന്ന പിഴവാണ് മരണകാരണമെന്ന് ബന്ധുക്കള്‍ പറഞ്ഞു. പോലീസ് അന്വേഷണവും കാര്യക്ഷമമല്ല. യഥാര്‍ത്ഥ മരണകാരണം കണ്ടു പിടിക്കാന്‍ സമഗ്ര അന്വേഷണവും ബന്ധുക്കള്‍ ആവശ്യപ്പെട്ടു. അന്വേഷണ ഉദ്യോഗസ്ഥരാരും തന്നെ ഇതു വരെ തങ്ങളുടെ വീട്ടിലെത്തി വിവരങ്ങള്‍ തേടിയിട്ടില്ല. ഡോക്ടര്‍മാരുടെ ഭാഗത്ത് നിന്നുണ്ടായ ഗുരുതര പിഴവ് സംബന്ധിച്ച് പോലീസില്‍ തുടര്‍പരാതികള്‍ നല്‍കുമെന്നും ബന്ധുക്കള്‍ പറഞ്ഞു.
നിയമ പരമായ എല്ലാ സേവനവും കുടുംബത്തിന് ഉറപ്പാക്കുമെന്ന് ജില്ലാ ലീഗല്‍ സര്‍വീസസ് അതോറിറ്റി അറിയിച്ചു.
പ്രതികരിക്കാൻ ഇവിടെ എഴുതുക: