ആലപ്പുഴ : പ്രസവം നിര്ത്താനുള്ള ശസ്ത്രക്രിയക്കിടെ മരിച്ച ആശാ ശരത്തിന് ശസ്ത്രക്രിയക്കിടെ ഹൃദയാഘാതം ഉണ്ടായെന്നും ആന്തരിക അവയവങ്ങളുടെ പ്രവര്ത്തനം നിലച്ചുവെന്നും പോസ്റ്റ്മോര്ട്ടം റിപ്പോര്ട്ട്. ശസ്ത്രക്രിയയില് സങ്കീര്ണതകള് ഉണ്ടായി.
വെള്ളിയാഴ്ച രാവിലെയാണ് ആശയെ ശസ്ത്രക്രിയയ്ക്കായി കടപ്പുറം വനിതാ ശിശു ആശുപത്രിയില് പ്രവേശിപ്പിച്ചത്. ശസ്ത്രക്രിയക്കിടെ അമിത രക്തസ്രാവം ഉണ്ടായതിനെ തുടര്ന്ന് ഗുരുതരാവസ്ഥയിലായതോടെ മെഡിക്കല് കോളജ് ആശുപത്രിയിലേക്ക് മാറ്റി. ഇവിടെ ചികിത്സയിലിരിക്കെയാണ് മരണം.
താക്കോല്ദ്വാര ശസ്ത്രക്രിയക്കിടെ സാധാരണ സങ്കീര്ണതകളുണ്ടാകാറില്ല. കടപ്പുറം ആശുപത്രി അധികൃതരുടെ വീഴ്ചയാണ് സംഭവത്തിനുപിന്നിലെന്നും അന്വേഷണം വേണമെന്നാവശ്യപ്പെട്ട് പരാതി നല്കുമെന്നും ബന്ധുക്കള് വെളിപ്പെടുത്തിയിരുന്നു. വിഷയത്തില് ജില്ലാ ലീഗല് സര്വീസസ് അതോറിറ്റി കടപ്പുറം വനിതാ ശിശു ആശുപത്രി സൂപ്രണ്ടില് നിന്ന് റിപ്പോര്ട്ട് തേടി. ആശയുടെ ഭര്ത്താവ് ശരത്ത് വിദേശത്താണ്.
