ബെംഗളൂരു: മാണ്ഡ്യ ജില്ലയിലെ മേലുകോട്ടെയിൽ കാണാതായ അദ്ധ്യാപകയുടെ മൃതദേഹം കുഴിച്ചിട്ട നിലയിൽ കണ്ടെത്തി. പാണ്ഡവപുര താലൂക്കിലെ മാണിക്യഹള്ളി സ്വദേശി ദീപിക വി ഗൗഡയാണ് മരിച്ചത്. ഭർത്താവിനും ഏഴ് വയസുള്ള മകനുമൊപ്പമായിരുന്നു ഇവർ താമസിച്ചിരുന്നത്.
ശനിയാഴ്ച രാവിലെ ഒമ്പത് മണിയോടെ സ്കൂട്ടറിൽ സ്കൂളിലേക്ക് പോയ ദീപികയെ പിന്നീട് ആരും കണ്ടിട്ടില്ല. ഫോണിൽ ബന്ധപ്പെടാൻ ശ്രമിച്ചെങ്കിലും സ്വിച്ച് ഓഫ് ആയിരുന്നു. ഇതോടെ യുവതിയുടെ ഭർത്താവ് പോലീസിൽ പരാതി നൽകി. തിങ്കളാഴ്ച വൈകിട്ട് വീണ്ടും പ്രദേശത്ത് തിരച്ചിൽ നടത്തവെ സംശയം തോന്നിയ സ്ഥലത്തെ മണ്ണ് നീക്കിയപ്പോഴാണ് മൃതദേഹം കണ്ടെത്തിയത്.
പ്രദേശവാസിയായ നിതീഷ് എന്നയാളാണ് ദീപികയെ അവസാനമായി വിളിച്ചതെന്നും ഇയാളാണ് കൊലപാതകത്തിന് പിന്നിലെന്നും കുടുംബം ആരോപിക്കുന്നു. മൃതദേഹം കണ്ടെത്തിയതോടെ ഇയാൾ ഒളിവിലാണ്. പ്രതിക്ക് വേണ്ടിയുള്ള അന്വേഷണം പോലീസ് ആരംഭിച്ചു.
