കാസര്കോട് : വ്യാജ രേഖ നല്കി കാസര്കോട് കരിന്തളം ഗവണ്മെന്റ് കോളേജില് അധ്യാപികയായി ജോലിക്ക് കയറിയെന്ന കേസില് മുന് എസ്എഫ്ഐ നേതാവ് വിദ്യമാത്രമാണ് പ്രതിയെന്ന് പോലീസ്. മഹാരാജാസ് കോളേജിന്റെ പേരില് പ്രവര്ത്തി പരിചയ സര്ട്ടിഫിക്കറ്റുണ്ടാക്കിയാണ് വിദ്യ ജോലിക്ക് കയറിയതെന്നും നീലേശ്വരം പോലീസ് ഹോസ്ദുര്ഗ് ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് സമര്പ്പിച്ച കുറ്റപത്രത്തില് പറയുന്നുണ്ട്.
മഹാരാജാസ് കോളേജിന്റെ പേരിലുള്ള വ്യാജ പ്രവര്ത്തി പരിചയ സര്ട്ടിഫിക്കറ്റ് ഹാജരാക്കി ഒരു വര്ഷം കരിന്തളം ഗവ. കോളേജില് വിദ്യ ജോലി ചെയ്തെന്നാണ് കേസ്. വിദ്യ മാത്രമാണ് കേസില് പ്രതിയായിട്ടുള്ളത്. വ്യാജരേഖ നിര്മിക്കാന് മറ്റാരുടെയും സഹായം ലഭിച്ചിട്ടില്ല. അവര് തന്റെ മൊബൈല് ഫോണില് സ്വന്തമായി വ്യാജ രേഖ നിര്മിക്കുകയായിരുന്നു. പ്രിന്റ് എടുത്തശേഷം അതിന്റെ ഒറിജിനല് നശിപ്പിക്കുകയായിരുന്നെന്നും പോലീസിന്റെ കുറ്റപത്രത്തില് പറയുന്നുണ്ട്.
വ്യാജ സര്ട്ടിഫിക്കറ്റ് ഉപയോഗിച്ച് സര്ക്കാര് ശമ്പളം കൈപറ്റി. വ്യാജരേഖ നിര്മിക്കല്, വ്യാജരേഖ സമര്പ്പിക്കല്, വഞ്ചന, തെളിവ് നശിപ്പിക്കല് എന്നീ വകുപ്പുകളാണ് വിദ്യക്കെതിരെ ചുമത്തിയിരിക്കുന്നത്. ജൂണ് 27 നാണ് കരിന്തളം ഗവ. കോളേജില് ഗസ്റ്റ് ലക്ചറര് ജോലിക്കായി വ്യാജ പ്രവര്ത്തി പരിചയ സര്ട്ടിഫിക്കറ്റ് സമര്പ്പിച്ചതിന് വിദ്യ അറസ്റ്റിലാകുന്നത്. നേരത്തെ അന്വേഷണം പൂര്ത്തിയായെങ്കിലും കുറ്റപത്രം സമര്പ്പിക്കാന് വൈകുകയായിരുന്നു. മണ്ണാര്ക്കാട് കോടതിയില് നിന്ന് ചില ശാസ്ത്രീയ തെളിവുകളുടെ സര്ട്ടിഫൈഡ് കോപ്പികള് ലഭിക്കാനുള്ള കാലതാമസം മൂലമാണ് കുറ്റപത്രം സമര്പ്പിക്കാന് വൈകിയത്.
