ഭഗവൻ വിഷ്ണുവിന്റെയും മഹാദേവന്റെയും അനുഗ്രഹം നരേന്ദ്രമോദിക്കുണ്ട് : എച്ച്ഡി ദേവഗൗഡ

അയോധ്യ: ദൈവം പ്രാണ പ്രതിഷ്ഠ പൂജകളിൽ പങ്കെടുക്കാൻ പ്രധാനമന്ത്രി നരേന്ദ്ര മോദിക്ക് അറിഞ്ഞ് നൽകിയ അവസരമാണിതെന്ന് മുൻ പ്രധാനമന്ത്രിയും ജനതാദൾ സെക്യുലർ തലവനുമായ എച്ച്ഡി ദേവഗൗഡ. യുപി മുഖ്യമന്ത്രി യോഗി ആദിത്യനാഥിന്റെ ക്ഷണപ്രകാരം പ്രാണപ്രതിഷ്ഠ ചടങ്ങിന് അയോധ്യയിലെത്തിയതായിരുന്നു അദ്ദേഹം.

” ഇന്ന് അയോധ്യയെ സംബന്ധിച്ച് ഏറെ വിലമതിക്കാൻ കഴിയാത്ത ദിവസമാണ്. എന്നെ ചടങ്ങിൽ പങ്കെടുക്കാൻ ക്ഷണിച്ച യോഗിജിയോട് നന്ദി പറയുന്നു. ഇന്ന് ഒരു ചരിത്ര ദിവസമാണ്, പ്രധാനമന്ത്രിയോടും നന്ദി രേഖപ്പെടുത്തുന്നു. രാം ലല്ലയിൽ നരേന്ദ്ര മോദി പൂജ കർമ്മങ്ങളിൽ പങ്കെടുക്കുന്നുണ്ട്, ഇത് അദ്ദേഹത്തിന് ദൈവം അറിഞ്ഞ് നൽകിയ അവസരമാണ്. അദ്ദേഹത്തിന് ഭഗവാൻ വിഷ്ണുവിന്റെയും ശിവന്റെയും അനുഗ്രഹം ഉണ്ട് ” ദേവഗൗഡ എഎൻഐയോട് പറഞ്ഞു.

ഇന്ത്യ മുന്നണി ചടങ്ങിൽ നിന്നും വിട്ടുനിൽക്കുന്നതിനെയും അദ്ദേഹം വിമർശിച്ചു. അവരുടെ നിലപാട് അവർ കാണിച്ചു. എന്നാൽ എടുത്ത തീരുമാനം ശരിയല്ലയെന്നാണ് തനിക്ക് തോന്നുന്നതെന്ന് അദ്ദേഹം വ്യക്തമാക്കി.