മലപ്പുറം : എസ്.കെ.എസ്.എസ് നേതാവ് സത്താര്‍ പന്തല്ലൂരിനെതിരെ ഗുരുതര ആരോപണമുന്നയിച്ച് പാണക്കാട് കുടുംബാംഗം.സമസ്തയിലെ മുതിര്‍ന്ന നേതാക്കള്‍ക്കെതിരായ ഭീഷണിക്കത്തിന് പിന്നില്‍ സത്താര്‍ പന്തല്ലൂര്‍ ആണെന്ന് പാണക്കാട് സമീറലി ശിഹാബ് തങ്ങള്‍ ആരോപിച്ചു.
അതിനിടെ സത്താര്‍ പന്തല്ലൂരിന് പിന്തുണയുമായി സമസ്തയുടെ ഒരു വിഭാഗം നേതാക്കള്‍ വാര്‍ത്ത കുറിപ്പിറക്കി. ഇപ്പോള്‍ സമസ്ത അണികള്‍ക്കിടയില്‍ പ്രചരിക്കുന്നത് പത്ത് വര്‍ഷം മുന്നേയുള്ള കത്താണ്. അന്തരിച്ച സമസ്ത മുശാവറ അംഗവും മുതിര്‍ന്ന നേതാവുമായിരുന്ന ടി.എം ബാപ്പു മുസ്ലിയാര്‍ ,സമസ്ത സെക്രട്ടറി എംടി അബ്ദുള്ള മുസ്ലിയാര്‍ എന്നിവരെ അധിക്ഷേപിച്ച് ഭീഷണി മുഴക്കുന്നതാണ് കത്തിന്റെ ഉള്ളടക്കം. ഈ കത്ത് തയാറാക്കിയത് സത്താര്‍ പന്തല്ലൂര്‍ ആണെന്നാണ് പാണക്കാട് സമീറലി തങ്ങളുടെ ആരോപണം.
സമസ്തക്ക് തെളിവ് സഹിതം പരാതി നല്‍കാനാണ് സമീറലി തങ്ങള്‍ തയാറെടുക്കുന്നത്. എന്നാല്‍ സത്താര്‍ പന്തല്ലൂര്‍ ആലങ്കരികമായി ഉപയോഗിച്ച വാക്കിന്റെ അര്‍ത്ഥം ഉള്‍ക്കൊള്ളാതെ ചിലര്‍ ദുഷ്പ്രചാരണം നടത്തിയെന്നും മുസ്ലിം സമുദായത്തില്‍ എക്കാലത്തും ഭിന്നത ഉണ്ടാക്കിയ കേന്ദ്രങ്ങളാണ് ഇതിനു പിന്നിലെന്നും ഒരു വിഭാഗം സമസ്ത നേതാക്കള്‍ വാര്‍ത്ത കുറിപ്പിറക്കി.
പ്രസംഗം ഇതര മതസ്ഥര്‍ക്കെതിരായ പ്രചാരണമാണെന്ന് തെറ്റിദ്ധരിപ്പിക്കാന്‍ കൂട്ട് നിന്നവര്‍ മാപ്പ് പറയണമന്നും സമസ്ത നേതാക്കള്‍ ആവശ്യപ്പെട്ടു. ഉമര്‍ ഫൈസി മുക്കം,എ വി അബ്ദുറഹ്മാന്‍ മുസ്ലിയാര്‍, വാക്കോട് മൊയ്തീന്‍ കുട്ടി ഫൈസി, ഹമീദ് ഫൈസി അമ്പലക്കടവ് തുടങ്ങിയവരാണ് സംയുക്ത പ്രസ്താവനയില്‍ ഒപ്പുവച്ചിട്ടുളളത്.
പ്രതികരിക്കാൻ ഇവിടെ എഴുതുക: