ഗുരുവായൂര്‍: ബുധനാഴ്ച മകള്‍ ഭാഗ്യയുടെ വിവാഹത്തിന് മുന്നോടിയായി അവസാന വട്ട ഒരുക്കങ്ങള്‍ വിലയിരുത്താന്‍ സുരേഷ് ഗോപി രാത്രി ഗുരുവായൂര്‍ ക്ഷേത്രത്തില്‍ എത്തി. വിവാഹം എവിടെയാണ് നടക്കുന്നതെന്നതടക്കമുളള വിവരങ്ങള്‍ സുരക്ഷാ ഉദ്യോഗസ്ഥരോട് വിശദീകരിക്കാനായാണ് സുരേഷ് ഗോപി ക്ഷേത്രത്തിലെത്തിയത്. പ്രധാനമന്ത്രി മണ്ഡപത്തില്‍ എത്തുന്നതിനാല്‍ കര്‍ശന സുരക്ഷയിലാണ് ഗുരുവായൂര്‍.
ക്ഷേത്രത്തില്‍ എത്തിയശേഷം മടങ്ങുന്നതിനിടെ സുരേഷ് ഗോപിയെ ഭക്തജനങ്ങള്‍ വളഞ്ഞു. സെല്‍ഫിയെടുക്കാനും ആശംസകള്‍ അറിയിക്കാനും താരത്തിന്റെ ആരാധകരും തിക്കി തിരക്കി.
ബുധനാഴ്ച രാവിലെ 8.45 ന് ഗുരുവായൂര്‍ ക്ഷേത്ര നടയിലാണ് ഭാഗ്യ സുരേഷിന്റെ വിവാഹം. മാവേലിക്കര സ്വദേശിയും ബിസിനസുകാരനുമായ ശ്രേയസ് മോഹന്‍ ആണ് ഭാഗ്യയുടെ വരന്‍.തിരുവനന്തപുരം കേന്ദ്രമാക്കി ബിസിനസ് നടത്തുന്ന മോഹന്‍- ശ്രീദേവി ദമ്പതികളുടെ മകനാണ് ശ്രേയസ്. സൈന്യത്തില്‍ നിന്ന് വിരമിച്ചതിന് ശേഷം ബിസിനസ് രംഗത്ത് എത്തിയ ആളാണ് മോഹന്‍. ഭാഗ്യയുടെയും ഗോകുല്‍ സുരേഷിന്റെയും അടുത്ത സുഹൃത്ത് ആണ് ശ്രേയസ് മോഹന്‍.
സിനിമാമേഖലയില്‍ നിന്ന് ദുല്‍ഖര്‍ സല്‍മാന്‍, ടൊവിനോ തോമസ് തുടങ്ങിയ താരങ്ങള്‍ എത്തുമെന്നാണ് അറിയുന്നത്. മോഹന്‍ലാലും മമ്മൂട്ടിയും കുടുംബസമേതം ഗുരുവായൂരിലെത്തിയിട്ടുണ്ട്.19 ന് കൊച്ചിയിലും 20 ന് തിരുവനന്തപുരത്തും വിരുന്ന് സംഘടിപ്പിച്ചിട്ടുണ്ട്. കൊച്ചിയിലെ വിരുന്നില്‍ സിനിമ, രാഷ്‌ട്രീയ മേഖലകളില്‍ നിന്നുള്ള പ്രമുഖര്‍ പങ്കെടുക്കും. ബന്ധുക്കള്‍ക്കും നാട്ടുകാര്‍ക്കും സുഹൃത്തുക്കള്‍ക്കുമാണ് തിരുവനന്തപുരത്തെ വിരുന്നിലേക്ക് ക്ഷണമുളളത്..
പ്രതികരിക്കാൻ ഇവിടെ എഴുതുക: