ജനുവരി 22ന് അയോദ്ധ്യയില് രാമക്ഷേത്രത്തിന്റെ പ്രാണപ്രതിഷ്ഠ നടക്കുകയാണ്. നാടെങ്ങും ഉത്സവം കൊണ്ടാടുന്ന തയ്യാറെടുപ്പിലാണ്. അക്ഷതവിതരണവും ഗൃഹസമ്പര്ക്കങ്ങളുമായി ശ്രീരാമഭക്തര് കര്മ്മങ്ങളില് മുഴുകിയിരിക്കുകയാണ്. സോഷ്യല് മീഡിയകളിലും പ്രാണപ്രതിഷ്ഠ ആഘോഷമാക്കുകയാണ്. ഇതിനിടയില് മലയാളികളുടെ പ്രിയ ഗായിക കെ എസ് ചിത്രയുടെ വീഡിയോ ശ്രദ്ധനേടുകയാണ്. പ്രാണപ്രതിഷ്ഠാദിനത്തില് ഭഗവാനെ സ്വീകരിക്കുന്നതിനെക്കുറിച്ചാണ് വീഡിയോ.
‘അയോധ്യ രാമക്ഷേത്രത്തിന്റെ പ്രതിഷ്ഠാദിനമായ ജനുവരി 22ന് എല്ലാവരും ഉച്ചയ്ക്ക് 12, 20ന് ശ്രീരാമ ജയരാമ’എന്ന് രാമമന്ത്രം ജപിച്ചു കൊണ്ടിരിക്കണം. അതുതുപോലെ വൈകുന്നേരം അഞ്ച് തിരിയുള്ള വിളക്ക് വീടിന്റെ നാനാ ഭാഗത്തും തെളിക്കണം. ഭഗവാന്റെ അനുഗ്രഹം എല്ലാവര്ക്കും ഉണ്ടാകട്ട എന്ന് പരിപൂര്ണമായി പ്രാര്ത്ഥിക്കുന്നു. ലോകാ സമസ്താ സുഖിനോ ഭവന്തു’ ചിത്ര വീഡിയോയില് പറയുന്നു.
കഴിഞ്ഞദിവസം കെ എസ് ചിത്രയുടെ വീട്ടിലും അക്ഷതവുമായി പ്രവര്ത്തകര് എത്തുകയും സ്വീകരിക്കുകയും ചെയ്തിരുന്നു.
ജനുവരി ഒന്നിന് ആരംഭിച്ച മഹാസമ്പര്ക്കത്തില് സംസ്ഥാനത്താകെ അണിചേരുന്നത് ആയിരക്കണക്കിന് ആളുകളാണ്. 36000 ബാച്ചുകളായി അമ്പത് ലക്ഷം വീടുകളിലേക്ക് അയോദ്ധ്യയില് നിന്ന് പൂജിച്ച് കൊണ്ടുവന്ന അക്ഷതമെത്തിക്കുകയാണ് ദൗത്യം. ആത്മീയാചാര്യന്മാര്, പൊതുപ്രവര്ത്തകര്, ചലച്ചിത്രതാരങ്ങള്, സാംസ്കാരിക നായകര് തുടങ്ങി വീട്ടമ്മമാരും സര്വസാധാരണക്കാരും വരെ ഭക്തിപുരസ്സരം അക്ഷതം ഏറ്റുവാങ്ങുന്നു. വീടുകളിലെ പൂജാമുറിയില് അവര് അക്ഷതം സൂക്ഷിക്കും. രാമക്ഷേത്ര പ്രാണപ്രതിഷ്ഠയ്ക്കായി പ്രാര്ത്ഥനകളോടെയാണ് എല്ലാവരും സമ്പര്ക്കത്തെ സ്വീകരിക്കുന്നത്. ഭജനയും നാമജപവുമായാണ് ഓരോ വീട്ടിലും സമ്പര്ക്ക സംഘമെത്തുന്നത്.
അയോദ്ധ്യയിലെ പ്രാണപ്രതിഷ്ഠാച്ചടങ്ങിന് പങ്കെടുക്കുന്നവര്ക്കുള്ള ക്ഷണപത്രവും ഇതിന്റെ ഭാഗമായി കൈമാറുന്നുണ്ട്. 15 വരെയാണ് സമ്പര്ക്കം. പ്രാണപ്രതിഷ്ഠാദിനമായ 22ന് രാവിലെ മുതല് തന്നെ കേരളത്തിലെ എല്ലാ ഗ്രാമങ്ങളിലും ക്ഷേത്രങ്ങള് കേന്ദ്രീകരിച്ച് വിവിധ പരിപാടികള് നിശ്ചയിച്ചിട്ടുണ്ട്. രാവിലെ 11 മുതല് അയോദ്ധ്യയിലെ പ്രാണപ്രതിഷ്ഠയുമായി ബന്ധപ്പെട്ടുള്ള ചടങ്ങുകള് ഗ്രാമക്ഷേത്രങ്ങളിലും ആരംഭിക്കും. പ്രാണപ്രതിഷ്ഠാച്ചടങ്ങുകള് തത്സമയം കാണിക്കുന്നതിനുള്ള സജ്ജീകരണങ്ങളും ഒരുക്കിയിട്ടുണ്ട്. വൈകുന്നേരങ്ങളില് എല്ലാ വീടുകളിലും ദീപാവലി കൊണ്ടാടണമെന്ന അഭ്യര്ത്ഥനയും സമ്പര്ക്കത്തിന്റെ ഭാഗമായി നല്കുന്നുണ്ട്.
