മുംബൈ: കുപ്രസിദ്ധ അധോലോകനായകന്‍ ദാവൂദ് ഇബ്രാഹിം കുട്ടിക്കാലത്തിന്റെ ഒരു ഭാഗം ചെലവഴിച്ച അമ്മയുടെ നാല് സ്വത്തുക്കളില്‍ രണ്ടെണ്ണം വെള്ളിയാഴ്ച നടന്ന ലേലത്തില്‍ വിറ്റുപോയി. ഒരു വ്യക്തി തന്നെയാണ് രണ്ട് സ്വത്തുക്കളും ലേലത്തില്‍ പിടിച്ചത്.
ലേലത്തില്‍ കിട്ടിയത് 2 കോടി മൂന്ന് ലക്ഷത്തി ഇരുപത്തൊമ്പതിനായിരും രൂപ
കാര്‍ഷികസ്വത്തായ 170.98 ചതുരശ്രമീറ്റര്‍ വിസ്തീര്‍ണ്ണമുള്ള ഭൂമി ലേലത്തില്‍ പോയത് 2.01 കോടി രൂപയ്‌ക്കാണ്. 15,440 കോടി രൂപയായിരുന്നു ലേലത്തില്‍ പങ്കെടുക്കേണ്ടവര്‍ മുന്‍കൂറായി കെട്ടിവെയ്‌ക്കേണ്ടിയിരുന്ന അടിസ്ഥാന തുക. 1730 ചതുരശ്രമീറ്റുള്ള മറ്റൊരു കൃഷിഭൂമി ലേലത്തില്‍ പോയത് 3.28 ലക്ഷം രൂപയ്‌ക്കാണ്. 1.56 ലക്ഷമായിരുന്നു മുന്‍കൂറായി കെട്ടിവെയ്‌ക്കേണ്ടിയിരുന്ന അടിസ്ഥാന ലേലത്തുക നിശ്ചയിച്ചിരുന്നത്. ഈ രണ്ട് സ്വത്തുക്കളും ലേലത്തില്‍ പിടിച്ച വ്യക്തിയുടെ പേര് വെളിപ്പെടുത്തിയിട്ടില്ല. തെക്കന്‍ മുംബൈയിലെ ആയകാര്‍ ഭവനില്‍ ആയിരുന്നു ലേലം. ഒരു സ്വത്തിന് മൂന്ന് പേരും മറ്റൊരു സ്വത്തിന് രണ്ട് പേരും ലേലത്തില്‍ പങ്കെടുത്തു.
രണ്ട് സ്വത്തുക്കള്‍ ലേലം പിടിക്കാന്‍ ആളില്ല
അതേ സമയം മറ്റ് രണ്ട് സ്വത്തുക്കള്‍ ലേലം പിടിക്കാന്‍ ആളില്ലായിരുന്നു. ഇത് 2000ലെ ലേലത്തെയാണ് ഓര്‍മ്മിപ്പിച്ചത്. അന്ന് 1993ല്‍ 257 പേരുടെ മരണത്തില്‍ കലാശിച്ച മുംബൈ സ്ഫോടനപരമ്പര ആസൂത്രണം ചെയ്ത ദാവൂദ് ഇബ്രാഹിം എന്ന അധോലോകനായകന്റെ സ്വത്തുകവകള്‍ ലേലത്തില്‍ വെച്ചപ്പോള്‍ എടുക്കാന്‍ ആളുണ്ടായില്ല. ഭയമായിരുന്നു കാരണം. എന്നാല്‍ മോദി 2014ല്‍ അധികാരത്തില്‍ വന്നശേഷം ക്രമേണ ദാവൂദിനെ ചുറ്റിപ്പറ്റിയുള്ള ഭീതിയെല്ലാം കുറഞ്ഞുവന്നു. 2020ല്‍ ദാവൂദിന്റെ കുട്ടിക്കാലവസതി ഉള്‍പ്പെടെ ആറ് സ്വത്തുക്കളും 2017ല്‍ മൂന്ന് സമ്പന്ന സ്വത്തുക്കളും ലേലത്തില്‍ വിറ്റുപോയി.
ലേലം ചെയ്തത് ദാവൂദിന്റെ മാതാവ് ആമിന ബിയുടെ മഹാരാഷ്‌ട്രയിലെ രത്നഗിരിയിലുള്ള കാര്‍ഷിക സ്വത്തുക്കള്‍
ദാവൂദിന്റെ മാതാവ് ആമിന ബിയുടെ മഹാരാഷ്‌ട്രയിലെ രത്നഗിരിയിലുള്ള കാര്‍ഷിക സ്വത്തുവകകളാണ് വെള്ളിയാഴ്ച ലേലം ചെയ്തത്. കേന്ദ്ര ധനകാര്യമന്ത്രാലയത്തിന്റെ കീഴിലുള്ള സഫേമയുടെ നടത്തിപ്പുകാരും മറ്റ് മഹാരാഷ്‌ട്ര സംസ്ഥാന സര്‍ക്കാര്‍ അധികൃതരും ചേര്‍ന്നാണ് ലേലം നടത്തിയത്. കള്ളക്കടത്തുകാര്‍ക്കും വിദേശ നാണ്യ ചൂഷകര്‍ക്കും വേണ്ടിയുള്ള (സ്വത്ത് കണ്ട് കെട്ടല്‍) നിയമമാണ് സഫേമ. രത്നഗിരി ജില്ലയിലെ മുംബാകെ ഗ്രാമത്തിലാണ് ദാവൂദ് വളര്‍ന്നത്. സ്വത്ത് കണ്ട് കെട്ടല്‍ നിയമപ്രകാരമുള്ള സ്വത്തുവകകളാണ് ലേലത്തിന് വെച്ചത്.
മോദി ഭരണത്തില്‍ വന്ന ഒമ്പത് വര്‍ഷക്കാലം ലേലം ചെയ്തത് ദാവൂദിന്റെ 11 സ്വത്തുക്കള്‍
. മോദി ഭരണത്തില്‍ വന്നതിന് ശേഷമുള്ള കഴിഞ്ഞ ഒമ്പത് വര്‍ഷക്കാലം ദാവൂദിന്റെ 11 സ്വത്തുക്കളോളം കണ്ടുകെട്ടി ലേലം ചെയ്തിട്ടുണ്ട്. ഇതെല്ലാം ചെറിയ തുകകളുടെ സ്വത്തുക്കളായിരുന്നു. ആകെ 19.2 ലക്ഷം രൂപയാണ് ലേലത്തില്‍ കിട്ടിയത്. പക്ഷെ 2017ല്‍ സഫേമ അധികൃതര്‍ വിലകൂടിയ ചില സ്വത്തുക്കള്‍ ലേലത്തില്‍ വിറ്റിരുന്നു. ഹോട്ടല്‍ റോങ്ക് അഫ്രോസ്, ശബ്നം ഗസ്റ്റ് ഹൗസ്, ഭെന്ദി ബസാറിനടുത്തുള്ള ആറ് മുറികളുള്ള ദമര്‍വാല ബില്‍ഡിംഗ് എന്നിവ 11 കോടി രൂപയ്‌ക്കാണ് ലേലം ചെയ്തത്. ദാവൂദിന്റെ ഇളയ സഹോദരന്‍ ഇഖ്ബാല്‍ കാസ്കര്‍ 2017 പാതി വരെ താമസിച്ച ഇടമാണ് ദമര്‍വാല ബില്‍ഡിംഗ്. പിന്നീട് ഇഖ് ബാല്‍ കാസ്കര്‍ അന്തരിച്ച സഹോദരി ഹസീന പാര്‍കറുടെ നാഗ് പാഡയിലെ ഗോര്‍ഡന്‍ ഹാള്‍ അപാര്‍ട്മെന്‍റിലേക്ക് താമസം മാറ്റി. ഇവിടെ നിന്ന് 2017ല്‍ ഇഖ്ബാല്‍ കാസ്കറെ അറസ്റ്റ് ചെയ്തു. അതിന് ശേഷം ഇതുവരെയും ഇയാള്‍ ജയിലിലാണ്.
ദാവൂദിന് വിഷം കൊടുത്ത വാര്‍ത്ത
ഏതാനും ആഴ്ചകള്‍ക്ക് മുന്‍പ് ദാവൂദ് ഇബ്രാഹിമിന് പാകിസ്ഥാനില്‍ ആരോ വിഷം കൊടുത്തതായി വാര്‍ത്തകള്‍ പ്രചരിച്ചിരുന്നു. പിന്നീട് ദാവൂദിന്റെ അനുയായിയായ ഛോട്ടാ ഷക്കീര്‍ തന്നെ ഇക്കാര്യം നിഷേധിച്ച് രംഗത്തെത്തിയിരുന്നു.
ദാവൂദ് ഇബ്രാഹിമിന് ഇപ്പോള്‍ 76 വയസ്സായി. അധോലോകനായകനായി ഇനി ദാവൂദ് ഇബ്രാഹിന് ഒരു തിരിച്ചുവരവില്ല. മിഡ് ജേണി എന്ന എഐ ആപ് ഉപയോഗിച്ച് ഈയിടെ ഇന്ത്യാ ടുഡേ പുറത്തുവിട്ട ഇപ്പോഴത്തെ ദാവൂദ് ഇബ്രാഹിമിന്റെ ചിത്രങ്ങള്‍ വൈറലായിരുന്നു.
പ്രതികരിക്കാൻ ഇവിടെ എഴുതുക: