വിജയകാന്തിന്റെ സ്മാരകത്തിന് മുന്നിൽ പൊട്ടിക്കരഞ്ഞ് സൂര്യ: വീഡിയോ

അന്തരിച്ച നടൻ വിജയകാന്തിന്റെ വിയോഗം തമിഴ് സിനിമാ ലോകത്തിനും സാധാരണക്കാർക്കുമടക്കം എത്ര വലിയ നഷ്ടമാണ് വരുത്തിയതെന്ന് സാക്ഷ്യപ്പെടുത്തുന്നതായിരുന്നു അദ്ദേഹത്തെ അവസാനമായി കാണാനെത്തിയ ജനക്കൂട്ടം. നടൻ രജനീകാന്തും വിജയ് യും അടക്കം തമിഴകത്തിന്റെ താരനിരയിലെ പ്രമുഖരെല്ലാം തന്നെ ക്യാപ്റ്റന് അന്ത്യാഞ്ജലി അർപ്പിക്കാൻ ഡി എം ഡി കെ ആസ്ഥാനത്ത് എത്തിയിരുന്നു. വിദേശത്ത് ആയിരുന്നതിനാൽ സൂപ്പർ താരം സൂര്യയ്‌ക്ക് ചടങ്ങുകൾക്ക് എത്താൻ കഴിഞ്ഞിരുന്നില്ല. ഇപ്പോഴിതാ ദിവസങ്ങൾക്ക് ശേഷം വിജയകാന്തിന്റെ സ്മൃതി മണ്ഡപത്തിലെത്തിയ സൂര്യ വിങ്ങിപ്പൊട്ടുന്ന വീഡിയോയാണ് പുറത്തുവന്നിരിക്കുന്നത്.

Never seen #SURIYA anna being this emotional in public 😭💔 pic.twitter.com/4cfMyg4RQg

— Online Suriya Fans Team™ (@OnlineSuriyaFT) January 5, 2024

വിജയകാന്തിന്റെ സ്മാരകത്തിന് മുന്നിൽ എത്തിയ സൂര്യ ദുഖം അടക്കാനാവാതെ വിങ്ങിപ്പൊട്ടുന്നത് വീഡിയോയിൽ കാണാം. തുടർന്ന് വിഷമത്തിൽ അദ്ദേഹം സ്മൃതി മണ്ഡപത്തിന് മുൻപിലായി തളർന്നിരിക്കുന്നതും വീഡിയോയിൽ വ്യക്തമാണ്. സഹോദരനും നടനുമായ കാർത്തിയും അദ്ദേഹത്തോടൊപ്പമുണ്ടായിരുന്നു. സ്മാരകത്തിൽ എത്തുന്നതോടൊപ്പം തന്നെ വിജയകാന്തിന്റെ വീട്ടിലും എത്തിയ സൂര്യ കുടുംബാഗങ്ങളെ ആശ്വസിപ്പിച്ചാണ് മടങ്ങിയത്.

വിജയകാന്തിനെ അവസാനമായി ഒരു നോക്കാൻ കാണാൻ കഴിയാതെ പോയതിൽ താനേറെ ദുഖിക്കുന്നുവെന്നും അത് ജീവിതകാലം മുഴുവൻ തനിക്കും സഹോദരനും ഒരു നൊമ്പരമായി മാറുമെന്നും സ്മാരകം സന്ദർശിച്ച് മടങ്ങവേ സൂര്യ പ്രതികരിച്ചു.താൻ വിജയകാന്തിൽ നിന്നും ഒരുപാട് കാര്യങ്ങൾ ജീവിതത്തിൽ പഠിച്ച വ്യക്തിയാണ്. അദ്ദേഹത്തിന്റെ ശൂന്യത ഒരിക്കലും നികത്താനാവാത്തതാണ്. സിനിമാ മേഖലയിൽ ക്യാപ്റ്റന്റെ ഓർമ്മയ്‌ക്കായി എന്തെങ്കിലും ചെയ്യണമെന്നും അതിന്റെ പ്രഖ്യാപനം ബന്ധപ്പെട്ടവരിൽ നിന്നും ഉടൻ തന്നെ ഉണ്ടാവുമെന്നാണ് താൻ പ്രതീക്ഷിക്കുന്നതെന്നും താരം പറഞ്ഞു. വിജയകാന്തിന്റെ സംസ്‌കാര ചടങ്ങുകൾ നടക്കുമ്പോൾ തന്റെ പുതിയ ചിത്രമായ കങ്കുവയുടെ ചിത്രീകരണവുമായി ബന്ധപ്പെട്ട് സൂര്യ വിദേശത്തായിരുന്നു.

സൂര്യയ്‌ക്കൊപ്പം അച്ഛൻ ശിവകുമാറും വിജയകാന്തിന് അന്തിമോപചാരം അർപ്പിച്ചു. സൂര്യയുടെ ആദ്യകാല ചിത്രമായ പെരിയണ്ണയിലാണ് (1999) വിജയകാന്തുമായി അദ്ദേഹം ഒരുമിച്ച് അഭിനയിച്ചത്.