ജൂനിയർ എൻടിആർ രക്ഷപ്പെട്ടത് തലനാരിഴയ്‌ക്ക്

ഭൂകമ്പവും സുനാമിയും രാജ്യത്ത് ആഞ്ഞടിച്ചപ്പോൾ തെലുങ്ക് നടൻ ജൂനിയർ എൻടിആർ കഴിഞ്ഞ ഒരാഴ്ചയായി ജപ്പാനിൽ അവധി ആഘോഷിക്കുകയായിരുന്നു. താൻ അവിടെ നിന്നും വീട്ടിലേക്ക് മടങ്ങിയതായി ജൂനിയർ എൻടിആർ അറിയിച്ചു. ജപ്പാനിൽ ഉണ്ടായ ഭൂകമ്പങ്ങളിൽ താൻ അതീവ ദുഃഖിതനാണെന്ന് താരം പുറത്തുവിട്ട പ്രസ്താവനയിൽ പറയുന്നു.

ഭൂകമ്പങ്ങൾക്കിടെയാണ് ജൂനിയർ എൻടിആർ ജപ്പാൻ വിട്ടത്. എൻ.ടി.ആർ ജപ്പാനിൽ കുടുങ്ങിയതായി റിപ്പോർട്ടുകൾ ഉണ്ടായിരുന്നു. ആശങ്കയോടെ കാത്തിരുന്ന ആരാധകരോട് താൻ നാട്ടിലേക്ക് മടങ്ങിയതായി അദ്ദേഹം അറിയിച്ചു. ഭൂകമ്പം ഉണ്ടാകുന്നതിന് മണിക്കൂറുകൾക്ക് മുൻപ് അദ്ദേഹം ജപ്പാനിൽ നിന്നും പുറപ്പെട്ടിരുന്നു. ജനുവരി ഒന്നിനാണ് ജപ്പാനിൽ ഭൂകമ്പം ഉണ്ടായത്.

‘ജപ്പാനിൽ നിന്ന് ഇന്ന് നാട്ടിലേക്ക് മടങ്ങി, ഭൂകമ്പത്തിൽ ഞെട്ടിപ്പോയി. കഴിഞ്ഞ ആഴ്ച മുഴുവൻ അവിടെ ചെലവഴിച്ചു, ബാധിച്ച എല്ലാവരോടും എന്റെ ഹൃദയം നിറഞ്ഞിരിക്കുന്നു. ജനങ്ങളുടെ സഹിഷ്ണുതയ്‌ക്ക് നന്ദി. വേഗത്തിൽ സുഖം പ്രാപിക്കുമെന്ന് പ്രതീക്ഷിക്കുന്നു. ശക്തമായി തുടരുക, ജപ്പാൻ ‘, താരം എക്സിൽ എഴുതി. ജനുവരി ഒന്നിന് ജൂനിയർ എൻടിആറും ഭാര്യയും രണ്ട് മക്കളും ഹൈദരാബാദ് വിമാനത്താവളത്തിൽ എത്തിയിരുന്നു.

ജപ്പാനിലുണ്ടായ ഭൂകമ്പത്തിൽ മരിച്ചവരുടെ എണ്ണം 30 ആയതായാണ് റിപ്പോർട്ടുകൾ. നിരവധി പേർ തകർന്ന കെട്ടിടാവശിഷ്ടങ്ങൾക്കുള്ളിൽ കുടുങ്ങിക്കിടപ്പുണ്ടെന്നാണ് വിവരം. ഭൂകമ്പം നാശം വിതച്ച പ്രദേശങ്ങളിൽ രക്ഷാ പ്രവർത്തനം തുടരുകയാണ്. ഭൂകമ്പത്തെ തുടർന്ന് പുറപ്പെടുവിച്ച സുനാമി മുന്നറിയിപ്പ് പിൻവലിച്ചിട്ടുണ്ട്. തിങ്കളാഴ്ച ഒറ്റദിനം മാത്രം 155 തുടർ ചലനങ്ങൾ ഉണ്ടായതായാണ് റിപ്പോർട്ട്.