മുംബയ് : മധ്യ-വടക്കന് അറബിക്കടലില് ഈ മാസം ചരക്ക് കപ്പലുകള്ക്ക് നേരെ ആക്രമണങ്ങള് ഉണ്ടായതിന് ശേഷം ഇന്ത്യന് നാവികസേന നിരീക്ഷണം വര്ദ്ധിപ്പിച്ചു.
പടക്കപ്പലുകള് അടങ്ങുന്ന സംഘങ്ങളാണ് മേഖലയില് നിരീക്ഷണം നടത്തുന്നത്. എന്തെങ്കിലും ആക്രമണമുണ്ടായാല് ചരക്ക് കപ്പലുകള്ക്ക് ഉടന് സഹായവുമായി നാവിക സേന എത്തും.ഇന്ത്യന് നാവികസേന തീരസംരക്ഷണ സേനയുമായി ചേര്ന്നാണ് നിരീക്ഷണം നടത്തുന്നത്.
മേഖലയിലെ ചരക്ക് കപ്പലുകളുടെ സുരക്ഷ ഉറപ്പാക്കാന് ഇന്ത്യന് നാവിക സേന പ്രതിജ്ഞാബദ്ധമാണെന്ന് നാവിക സേന പ്രസ്താവനയില് അറിയിച്ചു.
ചെങ്കടല്, ഏദന് ഉള്ക്കടല്, മധ്യ-വടക്കന് അറബിക്കടല് എന്നിവിടങ്ങളിലെ അന്താരാഷ്ട്ര കപ്പല്പ്പാതകളിലൂടെ സഞ്ചരിക്കുന്ന ചരക്ക് കപ്പലുകളില് സുരക്ഷാ സംവിധാനങ്ങള് വര്ധിപ്പിച്ചിട്ടുണ്ട്. അടുത്തിടെ എം വി റുയെന്, എം വി പ്ലൂട്ടോ എന്നീ ചരക്ക് കപ്പലുകള്ക്ക് നേരെ ഇന്ത്യന് സാമ്പത്തിക മേഖലയ്ക്ക് സമീപം ഡ്രോണ് ആക്രമണമുണ്ടായിരുന്നു. ഗാസയിലെ സംഘര്ഷത്തിന്റെ പശ്ചാത്തലത്തിലാണ് ആക്രമണമെന്ന് റിപ്പോര്ട്ടുണ്ട്.
